陶大宇與太太阿寶由謝天華推介，買下古代牧羊犬「大佬」飼養，兩公婆視牠如己出，百般寵愛，所以「大佬」好食好住，歎冷氣兼與主人同房大覺瞓，現時體重已達七十磅，更成為跑馬地狗界山寨王。
陶大宇婚後一直實行不生育計劃，所以四年前，夫婦二人開始搵狗大行動，希望物色一頭古代牧羊犬作伴，但因這種狗不普遍，訪尋半年亦未有所獲，直至好友謝天華偶然於旺角發現一頭擁有鴛鴦瞳孔的BB古代牧羊犬，連忙通知大宇睇狗，結果陶太阿寶對此犬一見鍾情，馬上買了牠，命名為「大佬」。
「當佢仔一樣」
今時今日，「大佬」經過大宇夫婦的悉心照料，好食好住，體重上揚至七十磅，份量十足。日前大宇拖「大佬」到跑馬地公園散步時，本來「大佬」表現乖巧，不過當大宇叫了一聲「返屋企」後，「大佬」即時情緒高漲，不停撲向主人及吠叫。
對於飼養這頭雄性巨犬，大宇笑說：「呢區都有四、五隻古代牧羊犬，但係『大佬』好出名㗎，呢頭啲嚤囉差（印度人）都知佢叫乜嘢名。我唔當佢係狗，當佢仔一樣，佢太有性啦，對眼識講嘢，咁多年大家習慣咗一齊，佢帶畀我哋好多歡樂，所以佢一有乜嘢頭暈身㷫，我哋好擔心㗎。」
瞓大床歎冷氣
大宇續說：「雖然佢好大隻，但係久唔久至吠一吠，冇侵略性，唔發脾氣，好儍，好忠心，成日跟住你嘅。陌生人摸佢、亂咁舞佢都得，不過佢唔會幫我捉賊囉。況且『大佬』歎慣，佢啲毛長，夏天要日日開冷氣，佢上床瞓嘅，重鍾意打橫攤喺我哋兩公婆個頭度㖭。」
採訪：朱倬誼
攝影：陳慧安
