年前中國首位太空人楊利偉訪港時，容祖兒事先張揚指大球場大如太空，所以會咪嘴演出。昨日神六兩位太空人費俊龍和聶海勝訪港，容祖兒在香港大球場舉行的「歡迎神舟六號航天代表團訪港大滙演」中，再次咪嘴獻唱，她解釋因患上感冒而出此下策，而阿姐汪明荃亦因身體不適咪嘴上陣。
香港大球場昨日舉行「歡迎神舟六號航天代表團訪港大滙演」，參與演出的歌星包括古巨基、何韻詩、Twins、容祖兒、張明敏及汪明荃等。其中容祖兒分別咪嘴演繹《越唱越強》及現場獻唱《龍的傳人》兩首歌，事後她解釋因患上感冒才被迫咪嘴。
病到散晒
「我覺得自己表現OK」
容祖兒說：「我都係辛苦命㗎啦，成個人都病到散晒呀，身體狀況我真係控制唔到，而《龍的傳人》個key唔係咁高就可以唱現場。」問祖兒會否覺得不尊重大會？她說：「真係冇辦法呀，我係唔舒服，又唔係走音，只係出唔到聲，我都有同大會講過，我覺得自己今日表現OK。」對於兩次太空人訪港都有份演出，祖兒坦言感到榮幸，她說：「佢哋真係好犀利呀，上次楊利偉嚟香港我都有份演出，今次重要打孖上就真係多一份勁呀，自己都好開心。」
汪明荃同樣咪嘴獻唱《勇敢的中國人》，她在兩位太空人離場時更把握機會上前握手及傾談。記者事後致電阿姐，發現她聲音沙啞，阿姐表示因身體不適所致，故此才要夾口形演出，她說：「呢幾日啱啱做完大戲，把聲好唔舒服，已經睇咗醫生。」問阿姐跟太空人談了些甚麼時，她說：「其實咁啱佢哋部車經過，咪同佢哋握吓手，歡迎佢哋嚟，叫佢哋玩得開心啲，其實楊利偉上次嚟我都有同佢握手，我覺得好光榮好滿足，因為佢哋係民族英雄。」
被指失準
「吓？我哋有走音咩」
而打頭陣演出的Twins事後被指演出有少許失準，蔡卓妍（阿Sa）反問記者說：「吓？我哋有走音咩？我戴咗耳筒聽唔到呀。」鍾欣桐（阿嬌）亦指演出時因戴上耳筒，聽不清現場觀眾的反應。問到二人會否覺得在大球場演出較難控制而考慮咪嘴，阿Sa說：「可能我哋唱歌唔係唱得咁好，我哋都會唱live攞多啲經驗，不過有時電台或電視台想音效出嚟好啲，會提議咪嘴。」
至於古巨基昨日選唱了十分配合大會主題的歌曲《明星》，他說：「佢兩個喺太空時一定有睇過星，而且佢哋已經成為大家心目中嘅明星，所以我就揀咗呢首歌。」基仔表演完畢後便輪到費俊龍和聶海勝出場，與兩位英雄擦身而過，基仔事後說：「其實有機會同佢哋對話嘅話，我好想同佢哋講一句『你哋好勁呀』，今次神六升空真係中國人嘅大事。另外我都好希望有機會可以參觀吓太空基地，或者可以去嗰度一齊倒數睇太空船升空都正呀。」基仔希望他日能有一粒星以其名字命名，屆時他會將星星取名為「古巨星」。
另一方面，何韻詩昨日在二百人的合唱團陪同下，獻唱《同你上太空》一曲，對於成功打低其他歌手演唱此歌，阿詩說：「有冇人爭我真係唔知，我今日都係負責出把聲，都係合唱團其中一位啫，我知道神六升空時已經作好咗呢首歌，我都唔知點解搵我唱㗎。」
力保形象
「特首在場企得直啲」
阿詩又強調《同》曲是屬於大家的，神六升空是中國人的驕傲，她有份參與其中感到非常榮幸。阿詩又笑言因是次活動有特首曾蔭權在場，故刻意表現得較平日端莊，她笑說：「我今日揀着黑色衫係因為覺得比較端莊，而且又有特首在場，我企都企得直啲呀。」
採訪：王崇穎、卓寶花、李珮洳 攝影：陳志嵐
