富豪酒店經歷金融風暴，終於走出低谷，最近更當選為傑出企業之一，執行董事羅寶文（圖）一見到華華就話近排忙到飛起，因為旗下幾間酒店，會陸陸續續裝修同擴建，好似銅鑼灣富豪咁，出年1月開始，會動工加建三層，增加五十幾間房，預計會用6千萬，投資咁多，卡士當然不小，係超五星級。
近期酒店旺到七彩，沙田麗豪、機場富豪同東方富豪咁，都會加層數加房間，預計每間房用30萬左右，加加埋埋會動用２億元。呢位甚為能幹嘅太子女話，佢地流動資金充足，所以筆錢全部係內部資金。
至於澳門個項目，就重等緊批文，佢話明年第一季應該可以落實，公司會負責番建築工程同埋日後嘅酒店營運，至於其他項目好似賭場咁，就「皇帝女唔憂嫁」，會揀個最合適嘅合作夥伴囉！