民主派今日就會橫渡大西洋，由倫敦轉抵華盛頓訪問，美國佬好畀面馬丁，唔單止國務卿賴斯，重安排好多有份量嘅官員見馬丁，連煲呔見唔到嘅國家安全顧問都見埋，唔似英國佬咁冇義氣，淨係搵個二打六出嚟。不過馬丁真係要昅住單仲偕，唔好俾佢破壞香港議員形象，以為佢哋只識得玩機。
八方聽聞，單仲偕喺布魯塞爾同歐盟議員會面時，一坐低就攞住部palm喺咁篤，連人哋個樣都唔望吓、一直篤到會面結束就走，驚死人哋唔知佢來自資訊科技界，有時中間插兩句嘴，佢咁嘅態度，搞到有啲老外議員都頂唔順，不時睥住佢；馬丁有時都忍唔住拍吓佢。
如果情況屬實，單仲偕都真係幾失禮。不過八方相信，單仲偕咁大個人，冇理由唔識禮貌，佢可能係想親身話畀歐盟知，功能組別議員啲質素係咁上下，所以歐盟一定要支持普選。
傳真︰2623-9278
電郵︰[email protected]