有詩云：「但願生兒愚且魯，無災無難到公卿」，呢句詩有冇現代意義？初睇好似冇，既笨蛋，又魯莽之人，點可以做大官，位至公卿吖，梗係聰明仔叻仔先至掂㗎！
諗深一層，以梁展文為例，呢句詩又好似有理由噃。自從審計署發表嘉亨灣報告，特區政府宣布設立三人委員會調查事件之後，梁展文自嘲「生人勿近」，佢響今日退休，本以為領匯上市（十一月二十五日）之後，叫做立咗大功先至退嘅，點知俾審計署報告搞到佢雞毛鴨血，連為佢而設嘅退休告別宴都由大廳搬去細房，可見人情冷暖，立竿見影。
上星期五晚飯，同枱竟有四人與梁展文有過工作往來經驗，四個人都話梁展文好夠膽，有承擔，敢去，但這正是為官大忌，官場內聰明夠膽做嘢之人必招人忌。八卦T話：「梁展文在八十年代初與劉淑儀跟隨鍾逸傑搞區域行政、區議會，鋒芒畢露，劉淑儀係佢手下，但後來劉淑儀爬頭，升官快佢好多，道理何在？就係梁展文叻得滯被人認為唔係teamplayer之過。」其他三人對地產商、地政署、屋宇署三署之互動關係甚為熟悉，認為當時做屋宇署長嘅梁展文運用酌情權，冇違反一向慣例，衰在信心爆棚，冇向上頭稟報，𠵱家就自己一個人孭晒鑊。
本欄以前都引述過公務員座右銘：「目標為次，程序為先」，為公眾做唔做到嘢，係次要問題，跟足程序，不做不錯，拖慢做完全無所謂，咁先至可以保住退休長俸。一群建築界、測量界、工程界人士在網上發動聯署公開信挺梁，信云：「工作上，你處事進取，作風開放，勇於承擔，而且敦促同事積極多走一步，多一點開明！……在層層官僚系統的制約下，你這種絕不因循的精神和辦事效率，都是我們欣賞和敬佩的，實為公務員的典範。」典範？要保住長俸，梁展文係反面教材，做官要無災無難等退休，千祈要打足官腔，練成A字膊。