先講一則漏網新聞。國際會計師公會今個月初，出資三十萬，贊助一個「未來會計王」比賽，中港共有十一間大學參賽，結果由兩支港隊——城大同港大得冠亞軍，打低北大、清華、中央財經大學等國內強隊。城大可謂威到盡，張信剛校長同校董會主席胡應湘（哥頓）飲得杯落。
國際會計師公會會長譚學林同八方講，個比賽全英語進行，用停咗牌嘅「科隆」做案例，香港代表勝在英文同表達能力好，又夠國際視野，而衣着得體，都令佢哋得到唔少印象分。
呢個比賽喺汕頭大學舉行，城大同港大嘅代表同八方講，冇諗過國內學府可以靚成咁，香港嘅大學真係差幾皮。梗係啦，間大學係超人誠哥出錢資助，大把水，又點會失禮人呢？
城大一億元見財化水
言歸正傳。近年政府削減大學資助，迫到八大院校校長好似乞兒咁（係理大潘宗光校長講嘅），四圍去打人心口。其中歷史較短、校友較不富貴嘅城大要搵人捐錢當然比人家困難，想攞政府配對基金，真係頭都大晒。資源匱乏，要添置新設施都要諗過度過，難怪城大打低北大、清華班會計精英，都對有誠哥照住嘅汕大流露出羨慕神色。
照計城大教得出咁優秀嘅同學，有乜理由得唔到城中富貴闊佬支持？八方一提出呢個疑問，就聽到一個古仔。話說去年，有個好出名嘅闊佬，打算捐一億元畀城大，對佢嚟講，呢筆錢並唔算多，但喺佢準備宣布前三日，城大發生咗一件事，就係換校董會主席。
記得去年初，城大要搵人做主席，李國章局長三顧「草廬」，甚至打出外婆牌，卒之邀得哥頓胡由理大轉投城大。哥頓胡係普林斯頓高才生，一向熱衷教育，曾經捐過好多錢畀普林斯頓，喺商界又識得咁多人，同董先生又友好，李局長慧眼識人，不惜出動婆婆用埋家族關係（胡李兩家係世交，胡應湘母親同李國章外婆好老友），打動對方，城大可謂深慶得人。
不過，原本想捐錢嗰個闊佬，唔知係咪唔鍾意兩個老婆婆嘅決定，抑或因為其他事覺得俾人做咗世界，或者其他原因，竟然唔捐錢住，咁城大呢一億銀就見財化水。好彩，城大班學生好爭氣又唔小器，嗱，好似上文講嗰班揚威汕大嘅未來會計王，今日為學校爭光，他日成材，更可以大大回饋母校呢!
傳真︰2623-9278
電郵︰[email protected]