返到屋企，你係咪習慣咗第一時間就扭開電視？呢種咁乏味嘅生活模式，好快就會由手機改寫！日前（25號），Nokia喺北京舉辦咗命名為OurMobileLife2006嘅手機預覽發布會，「新機」當然唔少得，但最令人期待，就係NSeries其中一員──N92！特別之處係佢具備4:3標準電視屏幕，並內置專為手機而開發嘅DVB-H數碼電視廣播技術，唔止係一部流動電視機咁簡單，重可以任選節目嚟睇，勁過癮！
記者、攝影：陳國輝
今次盛會可以用「機海」嚟形容，較突出者除咗N92及N80兩款，重有走摺機路線嘅N71。諾記更一口氣展示咗三款E系新機，包括E60、E61及E70；另外，重有玩音樂主題嘅3250以及為大中華而設嘅6708，淨係未喺香港發布過嘅型號，已達八款之多！雖然，當中分為娛樂、商務等唔同類型，但今次全屬中階或以上機款，功能之強，絕對令玩家期待！就連CEOJormaOllila都親自由芬蘭飛嚟北京撐場，就知Nokia對今次發布會幾咁重視！
N92
4:3屏幕睇電視
簡單啲講，其實DVB-H係一種手機專用嘅數碼電視廣播技術，用嗰時需要配合網絡以及內容節目供應商，可實時或重溫電視節目，預計香港最快06年中推出。N92平時係一部摺機，當機身揭起之後，屏幕可以扭轉，即變成一部座枱式迷你電視！配備2.8"QVGA大屏幕，支援1,600萬色，更特別嘅係採用4:3電視屏幕規格，擺明用嚟當電視咁睇！Keypad五方向掣可操作手機嘅同時，重能夠用嚟控制電視播放、停止以及揀選節目之用，加上機背配備咗一對Hi-Fi立體聲喇叭，音色重幾靚，可以作為流動電視機，行街或搭車嗰陣消磨吓時間，絕對適合不過！
配合呢項數碼電視技術，N92還支援3G制式以及WLAN技術，兩者都能提供數據下載服務，無論睇RealMedia、MPEG4以及3GPP影片播放，或者上網瀏覽網頁，都能感受到高速嘅寬頻樂趣。另外，N92除咗係一部迷你流動電視，重可扭屏變身成200萬像素DV，應付一般拍攝或錄影完全無問題。
N92Profile
制式：WCDMA/GSM三頻
體積：107.4×58.2×24.8mm
重量：191g
屏幕：2.8"1,600萬色
通話時間：240分鐘
備用時間：336小時
主要功能：DVB-H數碼電視廣播技術、200萬像素鏡頭、4:3標準電視屏幕、WLAN、四合一多媒體鍵
N80
支援UPnP遙控數碼家電
採用滑趟式機身設計嘅N80，雖然外形同N70有啲相似，略欠突破，但係強勁嘅功能搭夠，佢屬於第一款支援UPnP連接技術嘅手機。所謂「UPnP」就係應用於手機或PC嘅無線連接技術，由Nokia、SAMSUNG以及Microsoft等共同開發，特點在於毋須經過設定，就可以即時連接家中任何一件UPnP數碼電器，並能直接利用手機操作，功能勁過一個全能遙控器！
同時，N80更內置300萬像素鏡頭，可拍攝高達2,048×1,536解像度嘅相片，配合埋Printer一齊用嘅話，咁就隨時都可以印張高質素靚相啦！除咗300萬像素鏡頭，N80與N92及N71一樣，機身配備咗四合一多媒體鍵，㩒入去之後就會見到MusicPlayer、Web、VisualRadio以及Gallery四個選項，只需要直接㩒方向掣就可操作有關功能，聽歌、上網、睇相都更方便快捷！
N80Profile
制式：WCDMA/GSM四頻
體積：95.4×50×23.4mm
重量：134g
屏幕：26萬色
通話時間：180分鐘
備用時間：193小時
主要功能：UPnP連接技術、300萬像素鏡頭、WLAN、四合一多媒體鍵、音樂播放器、藍芽
玩盡上網．聽歌．手寫
如果話Nokia喺06年會主攻中階機嘅話，應該無人反對。同場重有另一款NSeries手機N71供傳媒試玩；另外，喺較早前已公布嘅幾款型號，亦同時以「真身」訪京！
N71新增MiniMap
MiniMap其實係由S60第三代平台進化而成，上網嗰陣，就可利用呢種新增技術，將網頁儲存並縮細，再瀏覽嗰陣就可以逐頁逐頁咁睇，成本電子書咁，夠晒整齊！
Profile：WCDMA/GSM三頻、26萬色彩芒、200萬像素鏡頭、MiniMap、MiniSD卡
推出日期：06年第一季
3250扭擰聽歌
其直立式機身底部，唔單止具備快速音樂播放鍵，原來重可以扭轉90度嚟影相，甚至扭轉270度變扭計骰，勁有創意！主攻音樂嘅3250，內置10MB記憶體及兼容最高1GBmicroSD卡，長途旅行都夠晒聽！
Profile：GSM三頻、26萬色彩芒、200萬像素鏡頭、扭擰鏡頭及音樂掣
推出日期：06年第一季
6708玩UIQ手寫輸入
特別為大中華玩家而設計嘅手機，採用中英文手寫輸入操作，最特別係行《Symbian》作業系統UIQ平台。內置《Quickoffice》、《Pushmail》以及《MSNMessenger》等，係一款實用之作！
Profile：GSM三頻、6萬5千色彩芒、130萬像素鏡頭、高達2GMiniSD卡
推出日期：06年第一季
E系為商界人士訂做
三款E系雖然同樣支援3G及WLAN，但功能卻各走極端。E60機身較細，但不設鏡頭，針對實用為主；E61加入BlackBerry功能及收發E-mail，對經常Check電郵嘅人士最有用；而E70就內置200萬像素鏡頭，以娛樂為主。
推出日期：06年第一季
現場花絮
