王天林的兒子王晶說：「作為父親，佢係百分百負責任，佢好錫屋企每一個人，好似我加入娛樂圈做嘢，佢冇真正落手落腳教我點拍戲，我只能喺佢身邊慢慢體會，咁我先可以得到好多啟發。好似阿爸以前做導演一味就係埋頭拍戲，唔理發行、行政呢啲嘢，成日俾人搵笨，到我出嚟做導演拍戲，當然唔會再犯阿爸以前犯過嘅錯，我唔想俾人主導太多，所以寧願自己開公司做老闆，可以有更大話事權。
50's王家衞
「阿爸咁多作品中，我最鍾意佢導演嘅《野玫瑰之戀》，呢部戲比較藝術，拍得相當有水準，喺我心目中，我簡直當佢係五十年代嘅王家衞，當年阿爸拍戲都會講吓藝術成份，而我自問係一位商業導演，一切以商業立場去考慮，如果講了解市場脈搏，我一定叻過佢，好似當年某類片已經有徵兆會走下坡，但老爸重未聞到味，重繼續拍，咁票房梗係唔得，如果係我老早已聞到味，拍其他新片種。
「近年阿爸因為怕悶先會客串做演員拍電影，佢拍杜琪峯啲戲，我唔會出聲，因為我知阿杜好錫佢，一定畀我阿爸有足夠休息時間。但有啲戲真係好離譜，要個老人家由朝踩到晚，結果拍到佢病埋，所以將來阿爸接戲，我要講明每日最少要畀八個鐘佢休息，冇就一定唔畀佢拍。」