啱啱度過咗八十四歲生日嘅賭王何鴻燊，前晚飲完壽酒，噚日喺四姨太梁安琪、女兒何超雄陪伴下，去咗中華遊樂會參加全球網球公開賽，佢同老拍檔梁兼紹打「150歲以上男子元老雙打」，精力十足。
賭王作賽時，無論接波同發球都非常淡定，連打四十五分鐘，成功冧莊，成為四連冠。賭王牙擦擦話打波一定要有信心，佢話：「真高興！當係我嘅生日禮物。」
記者問四姨太到底送咗乜禮物畀賭王？四太就話：「我咪係佢特別生日禮物囉！」佢重即刻將條絲巾縛上頸當禮物絲帶，相當冤氣。
四姨太怕曬
賭王又話間中有同幾位姨太打波，但四姨太怕曬出「癦屎」（即雀斑），所以唔敢多落場。提到十姑娘又登報「追數」，賭王話：「我唔講佢啲嘢，亦唔嬲，費事！有本事咪去法庭囉，我哋冇聯絡幾年，佢連祖先都冇拜，點聯絡？」
