童星出身、現職有線節目部執行董事的徐小明，十四歲加入武師行列，至十七、八歲升任武術指導期間，曾與成龍及元奎一起和李小龍合作，他直言李小龍是其偶像，又大讚李小龍無論在銀幕前後同樣魅力迫人，內涵與深度遠勝眾多武打明星，故曾與李小龍合作的人都不會忘懷他。
見識真功夫服晒
談到李小龍昔日拍戲的軼事時，徐小明笑指李小龍在電影內出拳時，必定配上一句鏗鏘有力的「阿－甴」，但其實原裝句子卻是粗口，他說：「李小龍出拳唔止肢體配合，面部表情都做到足，亦有聲音嘅幫助，佢會咬牙切齒咁講一句『×你××』，好有爆炸性，拍攝現場大家齊齊拍手叫好，但去到配音嘅時候就死嘞，『阿－甴』呢句係李小龍自己諗嘅，佢好叻，獅子怒吼嘅聲音更加帶出佢嘅風格，佢係一個武術家亦係好演員。」
徐小明又透露曾領教過李小龍的真功夫，原來拍攝《精武門》一片時，李小龍曾叫他扶實沙包。徐小明說：「佢講一句『扶實嘞喎』，跟住一邊膊頭撞埋嚟，即時震到我成個人軟晒，雖然我雙手重扶住個沙包，但只係得番個姿勢，一啲力都冇，真係好勁。不過嗰陣我哋成日笑佢，話李兆熊（前麗的監製）都打贏佢啦，因為喺《人海孤鴻》入面，李兆熊係唯一一個打贏佢嘅人。」
由於李小龍以武打片打出名堂，故當年有不少學武之人向他挑戰，徐小明說：「拍《龍爭虎鬥》現場好多臨記都係學武嘅人，有一個好想搵李小龍打，但李小龍唔理佢，一日李小龍行過，佢喺後面大聲講話：『李小龍，我×你××呀』，李小龍即時企定唔郁諗咗諗，個情形就好似戲中嘅佢咁，然後轉身，指一指對方，話：『你可以×我，但×我××就唔得』，然後屈一屈手指叫佢過嚟，嗰條友一埋身即刻一腳踢埋去李小龍度，李小龍輕輕避過，條友話：『呀，你都幾×快』，個『快』字未講完，已經瞓咗落地下，當時我哋成班人圍住睇，真係好精采。」
「我隻手就係武器」
連李小龍的已故助手林正英，亦一度對這個美國歸來的武術家不服氣，徐小明說：「當年拍《唐山大兄》，李小龍話武術指導韓英傑：『咁就做指導呀』，林正英係副指導，佢覺得呢個美國仔咁牙擦，卒之忍唔住問李小龍：『個個講到你咁威，堅定流㗎』，李小龍叫咗佢入酒店房，房間有兩張床，中間隔住個床頭櫃，李小龍叫林正英企喺一張床前面，攬實四、五個枕頭，然後一腳踢埋去，林正英即刻成個飛咗落第二張床，佢當堂就服晒，呢番說話係林正英親口同我講嘅。」
徐小明又透露李小龍返港初期拍攝《唐山大兄》和《精武門》時，經常與導演羅維因意見不合而發生摩擦，他憶述說：「有一次羅維報警，話生命受到威脅，有人攞刀對住佢條頸，當晚李小龍上《歡樂今宵》，我記得李小龍攤咗喺沙發度話：『我，一拳打幾磅？一腳踢幾磅？我隻手就係一件武器，我威脅人使乜用刀』。」