元家班出身的元華，除了曾在《精武門》一片中與李小龍對打外，更先後在《精武門》和《龍爭虎鬥》中擔任他的替身，過去他經常獲邀到李小龍家作客，試玩李小龍各式各樣的健身器材，甚至有機會欣賞李小龍穿着黑色三角內褲大跳自創的功夫舞。
健身器材贈母校
元華說：「當年我同林正英都幾熟，而林正英係李小龍助手，好多時李小龍會叫我哋去佢屋企玩。其實李小龍唔單止功夫好嘢，跳舞都好勁，記得佢試過着住條黑色三角底橫（即內褲）跳舞畀我哋睇，無論我哋播邊首音樂，佢都可以即時自創舞步出嚟，而且重係將功夫融入舞蹈，有時耍吓拳，有時只係郁吓啲肌肉，剛柔並重，全部夾晒拍子，真係唔到你唔服。」
除欣賞過李小龍的舞姿外，元華更有機會試玩李小龍家中各種先進的健身器材，他說：「佢啲健身儀器全部喺美國訂返嚟，記得佢有一部好似𠵱家電流減肥嘅儀器，我哋校到好細度數已經頂唔順，但李小龍佢將度數較到好勁都冇事，重要同啲電流鬥力鬥扯，舉啞鈴係舉二百磅嘅，我哋冇一個舉得起。」元華又透露李小龍家中本有一台由美國訂返港的多功能健身儀器，後來李小龍將儀器轉送母校喇沙書院，盡顯念舊一面。
不敢合照留遺憾
此外，原來當年《精武門》上映時，曾因政治因素而遭電檢處刪剪部份情節，元華說：「我喺《精武門》扮日本仔，有場戲係講李小龍想入公園，但公園門口掛住『華人與狗不得進入』嘅牌，我就同李小龍講，如果你想入去嘅話，就喺我褲襠捐過去，點知上映時呢場戲俾人cut咗，原來早年英國統治香港嘅時候，真係有啲咁嘅門牌字句，當時政府怕呢場戲會勾起市民嘅反政府情緒，所以電檢處將呢場戲cut咗，搞到我不知幾咁失望，好在第二輪再上嘅時候又加番落去。」
雖然當年經常與李小龍相處，但元華卻從沒機會跟對方合照留念，對此元華說：「李小龍其實好憎影相，所以我哋個個都唔敢出聲話同佢合照，呢方面我都覺得好遺憾。」