郭可盈早前因爭奪無綫台慶最佳女主角獎而是非纏身，最終她敗在汪明荃手下，可盈自言並沒失望，因為她深明遊戲的規則，可盈說：「攞唔攞到獎，中間有好多計算，呢啲大家心知。」
是非篇：跟黎姿成密友
踏入十一月以來，郭可盈、黎姿和汪明荃（阿姐）因爭奪無綫台慶的最佳女主角獎，鬧得滿城風雨，可盈口快快指阿姐應拿耆英專利的星輝大獎，阿姐及後力撐自己不是老人家，決意與可盈爭獎爭到底。另一邊廂，黎姿亦曾就此事說了一句：「佢（指郭可盈）想攞咪畀佢攞囉！」旋即捲入是非漩渦之中，其後更被翻出曾與可盈夫婿林文龍拍拖的陳年舊事。
無獎一身輕
台慶已告一段落，最佳女主角獎座已落在阿姐手中，可盈日前接受訪問時，她表示無獎一身輕，就算被傳媒大肆標題寫她「大熱倒灶」亦不介意，她說：「咁呢個的確係事實。」可盈續說：「賽果係點，我一早都話冇所謂，但大家點都唔相信，可能早幾年我表現得好恨攞獎，但𠵱家人大個咗，心態都改變咗，攞唔攞到獎，中間有好多計算同其他因素，呢啲大家心知。」既然可盈心知肚明有「其他因素」，為甚麼不好好營造這些「因素」去配合？她說：「因為我真係唔care，我睇攞獎呢件事，愈嚟愈睇得輕，我參加公司台慶，當參加一個派對咁，我嘅責任係扮到好靚咁出席。攞到獎只係錦上添花，攞唔攞到都唔會影響我嘅生活。」
張文慈慰問
對於爭獎風波，可盈一直以平常心去看待，她說：「某啲傳媒過份炒作，佢哋又寫我好識玩手段，我邊有咁高明？不過呢啲風波，的而且確令我上咗人生寶貴嘅一課，我雖然輸咗獎項，但我贏咗友情。」至於怎形容和黎姿的關係？可盈說：「我從來冇同GiGi（黎姿）合作過，都冇乜兩句，但呢件事之後，我哋通多咗電話，得閒又會發短訊慰問吓對方。我同GiGi𠵱家係完全傾到心事嘅朋友。」
對於文龍和黎姿的情史，可盈說：「佢哋傳緋聞時，我都未入行，就算佢哋拍過拖又點呀，𠵱家乜嘢年代，況且我同文龍又結咗婚。」可盈還表示很欣賞黎姿的爽朗個性，不排除日後遇到單身貴族時，會為黎姿做紅娘，幫好姊妹撮合姻緣。
原來可盈台慶失獎項後，收到張文慈透過朋友對她的問候，可盈說：「我唔認識張文慈，但佢竟然搵朋友同我講：『可盈，你唔好灰心，個個都好支持你，你嘅成績有目共睹！』呢一刻，我好感動，加上好多fans都好支持同關心我，其實呢啲對我嚟講已經係最好嘅獎品。」
「點解想我死」
經歷這些爭獎風波後，郭可盈表示感受良多：「我由選美入行到𠵱家已經十二年，台慶前嘅是非新聞，畀我第一次感受到娛樂圈係好複雜，特別某啲失實報道嘅誇張標題，有時我會諗，點解我又冇得罪你哋，點解想我死，係都要踩一腳，又話我博見報。」
擁有幸福家庭的可盈，備受負面新聞困擾，問她可想過退出？可盈說：「咁又唔會，我好鍾意呢一行，因為我喺呢行得到人生最重要嘅兩樣，分別係家庭同事業，我當年唔入行就識唔到老公文龍啦。」可盈已認定演戲是其終身事業，故此她會遵守此行的遊戲規則
──食得鹹魚抵得渴。
撰文：比華利
攝影：林德雄
髮型：VanChan@Hair
化妝：DorisMak
服裝：DorianHoCollection
