冬菇亭這種屋邨獨有飲食文化，望着大廚在火光熊熊下表演拋鑊、老闆得閒充當陪酒，與客人邊傾邊食，涼風送爽，把熱辣辣的小菜送進口，這種風味豈是高檔酒樓所能做到！
合興豬筒骨代豬腳愈滾愈甜
開了近20年的合興，一到冬天，老闆娘便會推出秘密武器「豬骨鍋」，「六年前啱啱興食豬骨煲我哋就開始賣，我每日都會同大廚去街市買新鮮豬筒骨熬湯，再加好多材料熬足個幾鐘，豬筒骨唔同豬腳，湯底長時間滾都唔會起膠，滾極都咁清，愈滾愈甜。」
日賣80鍋：豬骨鍋$68
用豬筒骨加上各種蔬菜和配料熬製，奶白色湯底充滿豬骨香。用牛柳旁邊最嫩滑的部份做手切肥牛（$68），放在豬骨湯淥一淥，原汁原味。鱔片（$48）新鮮即劏即片，每片都有2吋幾闊！
合興（27967986）
九龍灣啟業邨大牌檔5號舖
營業時間：4:30pm-1:30am
新富寶上湯淋雞夠嫩滑
呢度差唔多有30年歷史，有美林就有呢度。每位師傅都經驗老到，有20幾年入廚經驗，手勢好夠鑊氣。為咗衞生啲，還放棄一般循環再用膠筷子，改用用完即棄木筷子。
日賣30隻：菜膽上湯雞$128全隻
先用上湯將雞浸熟，再埋上湯芡。用上湯浸雞，令雞肉入味，雖然味道較清淡，但就保留雞肉嘅鮮味。
新富寶菜館（26913268）
沙田美林邨大牌檔11號
營業時間：11:00am-2:30pm、6:00pm-1:00am
創發客人幫襯食感情
除了街坊，有些食客更老遠由柴灣而來，「煮」理人李生話個個都係老友記，食到有感情，當然質素唔好，幾好感情都假，所以由買料到煮都由他負責，親力親為。
日賣30煲：羊腩煲$60
半肥瘦的黑草羊腩，加上秘製醬汁，滾起時放入枝竹和馬蹄等多種材料，食時再蘸上腐乳醬，吹住北風食最夠風味！
創發飯店（26056689）
沙田美林邨大牌檔12號
營業時間：4:00pm-1:00am
富記搞鬼菜名引死人
去到富記，發現唔少客一坐低就喺度頭岳岳，手指指，原來喺度估緊牆上啲菜名，好似白骨精，原來係蒸排骨；彩虹，就係韭菜豬紅等，令本來平凡嘅菜變得特別又吸引，有得食重有得玩！
日賣35碟：椒鹽金菇$38
條條金菇炸到金黃色，脆卜卜又香口。金菇入口除咗有椒鹽味之外，重有些少辣椒嘅味道，皆因師傅會加紅椒絲一齊炸。
富記大牌檔（26963497）
沙田隆亨邨熟食亭10-11號舖
營業時間：11:00am-2:00pm、6:00pm-2:00am