安寧控股（128）上星期三以貼近十球股數整咗一棍小陽燭，跟住兩日微調，成交連隨縮番落嚟，成交異動，再有微調，又兜轉。安寧資產當中，最吸引嘅係錢多，手頭淨現金5.2億銀，代表每股淨現金值近乎0.32元，同現價（0.32元）睇齊。又安寧NAV0.54元，現價重有40%折讓，經過往年為科網投資撥備，撥到乾乾淨淨，NAV應該足秤。安寧往績平平，PE39倍，一啲都唔吸引，但要咁睇，隻股大股東係小甜甜，家陣揸住安寧34.6%，呢手貨係2000年科網高峯期買入，當時每股成本價1.4元，隻股其志僅止於此？安寧潛在另類復甦概念。嚟緊日子，安寧若再有調整，挨近0.3元兜轉，短打風險有限。
泛店折讓大殘到痹
泛店（292）上星期五報12.9仙，「睇齊」阿媽泛海個上市編號129，不過冇啟示性，但現價12.9仙，又有嘢講：第一，泛店對上58個交易日，得7交易日係陽燭報收，其餘51個交易日係黑棍，未夠3個月，由1.94元直落，插足93%，上星期五創出2000年借殼上市（前身八佰伴）以嚟新低。現價12.9仙，包括上市以嚟第一手投資者在內，若然重揸住泛店，家陣冇乜贏家。第二，泛店呢個月16號先舊後新配10.1億股，最近7個交易日，泛店成交過20億股，止蝕打靶盤斷估喺消化中。又經伸手後，泛店NAV攤薄去到0.4元左右，現價NAV折讓67%，酒店股當中，泛店殘到痹。以呢期泛店每股伸手價0.195元，以現價計，短短57個交易日，跌咗33%，承配人若然重未走，唔見半億銀，何止肉痛？
錢雋