呢排阿旺勁Hit，師奶阿姐晚晚對住佢個冬菇頭，睇極唔厭；其實除咗佢個冬菇頭，由1975年開始出現、現在買少見少嘅冬菇亭大牌檔一樣深得民心。冬菇亭嘅數目，視乎屋村人數而定，像沙角邨就有四個冬菇亭。不過，近年入舖的入舖，政府更有計劃取締冬菇亭，趁𠵱家尚未消失，好去回味吓喇！
記者：梁學文、黃婉冰
攝影：譚盈傑、林栢鈞、黃子偉、伍慶泉
Model：AllfromSalvador
鳴謝：L&SWIGS（23840525）佐敦廟街188號地下
沙田排排坐
1.金城 唔用養殖海鮮
沙田友話去顯徑邨一定要去趟金城，因為呢度嘅海鮮最出名，大蝦、肉蟹、東星斑，全是老闆才哥每日親自揀選。「我一定用由海中捕獲的海鮮，不會用養殖，毋須太花巧已很鮮味。」
金城小廚
沙田大圍顯徑邨熟食廣場1-12號地下（26812212）
營業時間：5:30pm-12:00mn
1﹒日賣20碟：糯米蒸蟹$88
炒香的糯米飯放上原隻新鮮肉蟹，猛火一蒸，鮮味盡入飯中，粒粒沾有蟹的鮮甜和糯米香，肉蟹大隻得來肉嫩鮮甜，一份足夠四人食用。
2.樂園 街坊飯堂糖水任𢳂
當初禾輋商場未有咁多食肆，這裏便成了街坊飯堂，即使後來開多好多間餐廳酒樓，街坊依舊捧場。而這裏的員工個個都要着制服，鮮紅色好搶眼，亦係呢度嘅特色。此外，還有自助糖水供應，認真照顧周到。
樂園大牌檔
沙田禾輋邨街市大牌檔1號（26913933）
營業時間：6:00pm-1:30am
2﹒日賣35碟：雀巢黃金蛋$38
這款黃金蛋其實係鵪鶉蛋同墨魚丸。先將鵪鶉蛋同墨魚丸炸一炸，再加鹹蛋黃炒勻。黃金蛋入口好重鹹香味，鵪鶉蛋香口，墨魚丸爽口，口感一流！
3.陳根記燒臘海鮮點心檔
82年開始營業，由幾張枱仔到𠵱家幾十張枱，唔經唔覺成二十幾年。呢度唔單止有一般大牌檔有嘅燒臘檔，每日由魚市場新鮮運到嘅魚呀蝦呀，還有埋特色點心檔㖭！
陳根記
沙田禾輋邨街市大牌檔3至5號（26061390）
營業時間：4:00pm-1:30am
3﹒砵仔焗魚腸$38
呢款菜式甚有大牌檔風味。魚腸洗淨後，就加入葱花、芫荽、油炸鬼同蛋漿等一齊焗，焗完香氣十足。焗魚腸用來送飯就最啱，葱花同芫荽好清香，蛋漿亦吸收咗魚腸嘅鮮味。
4.文苑椒鹽鮮魷勁脆口
文苑最出名係海鮮小炒同火鍋，每晚都坐滿人。去呢度最好揀露天座位，雖然周圍無咩靚景睇，但就可以感受吓地道嘅風情，零舍好味！
文苑
沙田沙角邨熟食中心地下11號舖（26473696）
營業時間：5:00pm-1:30am
4﹒日賣50碟：椒鹽鮮魷$40
屋企個火唔夠猛，一定炒唔到啲鮮魷咁乾身卜卜脆，椒鹽味夠香之餘，入口亦爽口彈牙，梗係啦，招牌菜喎！
5.新強記70"大電視送飯
呢度以潮州打冷同海鮮為主打，亦有碟頭飯，但最抵係飲啤酒，最平$12兩支大啤，重有70吋大電視坐喺邊都睇得咁清楚。天氣凍亦都唔使怕，因為有擋風帳幕，坐喺入面食都唔怕吹親。
新強記
沙田隆亨邨熟食亭6號舖（26874468）
營業時間：5:30pm-2:00am
5﹒日賣25碟：果皮泥鯭$48/例牌
淨係加果皮同葱花蒸，蒸魚後魚肉吸收果香，也可帶出泥鯭嘅鮮甜。做法雖然簡單，但味道好豐富。
6.新合興師徒拍檔合力炒
大廚兼老闆之一嘅明師傅，開頭只係想幫吓親戚手做幾晚，後來就放棄埋酒家副總廚個位，帶埋徒弟拍住上開檔經營。餐牌上有近200款小菜，而且每個月都會推出新菜式！
新合興大牌檔
沙田新田圍熟食中心7-8號舖（26994991）
營業時間：5:00pm-12:00mn
6﹒日賣75隻：泰式炒蟹$48
有三隻膏蟹係咪好抵呢，而且係用上秘製咖喱汁，再加蒜茸同指天椒，聽到都吸引啦！
7.金沙角創新油物炸爆口！
已有二十多年歷史的金沙角，餐牌上十款有六、七款都是油炸菜式，菜名頗得意，老闆娘劉小姐話全是她和大廚共同創出來的得意之作，「我成日周圍食或返大陸等地取經，我覺得油炸菜佐酒，好有大牌檔風味。」
金沙角
沙田沙角邨熟食中心6號亭（26470902）
營業時間：5:30pm-4:00am
7﹒日賣35碟：雀巢黃金蛋$38
這款黃金蛋其實係鵪鶉蛋同墨魚丸。先將鵪鶉蛋同墨魚丸炸一炸，再加鹹蛋黃炒勻。黃金蛋入口好重鹹香味，鵪鶉蛋香口，墨魚丸爽口，口感一流！
九龍灣之選：漢記 老闆大廚創意小菜
曾是鹿苑大廚的華哥，認為做大牌檔小菜不能太名貴，但又唔想客人食到厭，惟有在材料上，加入創意。
漢記小廚
九龍灣啟業邨啟業街8號熟食亭（27960507）
營業時間：5:00pm-2:00am
椒鹽脆骨腩$48
用脆肉鯇魚腩炸香再加椒鹽炒香，魚肉爽脆，食完口內還留有陣陣魚香。
