踏入11月尾，聖誕氣氛已濃到漏出嚟！為應節，DVD最近大片密密出；猶記得上星期冇乜猛片，旺角啲DVD舖將套VCD《冬蔭功》翻煲咗成個禮拜！幸好星期四晚套《史密夫決戰史密妻》落場，全世界立即轉畫，俊男美女粒粒星、「真刀真槍」兩小口子耍花槍，同類片種唔多，難怪一出即成本周大熱賣；另外重有劉華《童夢奇緣》，親情、世情，好有Heart！小心有沙吹入眼！
記者：朱崇德 攝影：陳盛辰
發行：得利影視
區碼：3區
音效：DD5.1/dts5.1
影像：2.35:1（16:9）
字幕：中、英文等多種字幕
鬥氣殺手夫妻
一般鬥氣夫妻故事，多玩愛情小品，不過《史》玩到咁大卡士－畢彼特搭安祖蓮娜祖莉，型男配索女當然甚具睇頭；故事背景好搞笑，話說畢是一名金牌殺手，一次異地邂逅，竟然愛上另一殺手集團CEO（安飾），兩人在不知對方背景下，一舞傾情重閃電結婚；婚後大家邊要向枕邊人掩飾身份，邊要各自「搵食」（講緊殺人呀！），在一次狙擊行動中，兩人終於碰上頭，根據行規，殺手身份絕不能敗露於他人面前；一方面兩邊組織要佢哋48小時內殺死對方，否則夫妻兩就會雙雙受組織追殺，殺與不殺已是情義兩難，更令人頭痛者，原來背後重隱藏着一重大陰謀！
現實耍花槍激化版
夫妻鬥氣本是家常便飯，不過在這殺手之家，一個小誤會卻隨時惹來殺身之禍，事關佢哋嘅「耍花槍」，可是動用真刀真槍呀！如果家有惡婆娘或者有個臭男人，睇呢齣戲時會特別有Feel；有時身邊那人惹得你火光了，真係宜得一槍打爆佢個頭、一車撞死佢，喺《史》內佢哋會做晒畀你睇，不過問過好多睇完此戲的人，都係最鍾意中段在家中扭打一段，絕對係大家「家常便飯」的激化版，睇得份外投入！不過好彩故事結尾都算圓滿，就算幾恨這個身邊人，內心深處還是深愛着對方，寓意好正面。至於Bonus比較一般，幕後人員講評、刪剪鏡頭、製作花絮，都係大路嘢，真係冇乜睇頭。
DVDPro（23326326）
地址：旺角奶路臣街6E德發商場地庫B4舖
同場加映：《童夢奇緣》感人至深
故事如童話般，講劉德華孩提年代出身自破碎家庭，親母自殺，迫於與「後母」同住，家中摩擦日見尖銳；機緣下，喝下神秘生長藥，一夜間成了大人，可是成人身形、孩童心智，招惹連場笑料；不過戲肉可是重新以「同輩友人」身份，再次認識自己個「衰」老竇，促膝談心互訴心底話，對家、對人、對周遭事情，有了一份全新體會，可惜時間不饒人，藥力令他4日間成為垂垂老矣的糟老頭，他能否在最後一刻挽回這個家！
故事感人處，係這個破碎之家，好有香港的典型性，細味下可有大家的影子，令人感受更深；電影成功，特技化妝亦應記一功，外國化妝師MARKGARBARINO可是曾拍過《肥佬教授2》同《魔盜王》的化妝專家，劉華由青、壯再轉老，裝扮不下轉了十次，扮相維妙維肖，睇得令人更入戲。
神奇4俠下周殺到！
今個星期DVD戲碼咁強，下星期亦唔差，因為有套《神奇4俠》撐場。據知此片行孖碟，除DVD普通版（$158）外，重有一套連4隻「神奇4俠3吋Figure」嘅珍藏禮盒版（$260），全球限量1,000套，一定爭崩頭，有相熟碟舖嘅話，早啲叫人留定貨都得喇！
