香港管理專業協會上周六舉辦「服務及零售行業管理之轉變」研討會，請咗大酒店嘅行政總裁郭敬文（圖右），同希慎嘅董事總經理利子厚做講者，分享營商之道。
無論做零售抑或服務業，體貼顧客好重要，郭敬文講到如何穩中求變時提到，大酒店旗下嘅半島酒店喺保持傳統待客之道外，亦加入新元素，就好似喺客戶嘅浴虹旁安放電視機，讓客人一邊浸浴，一邊歎電視。
另外，浴缸邊重有個開關掣，當有電話入時，客人只要按一吓個掣就可以接聽，最體貼嘅係，電話有特別隔音設計，對方唔知你正在沐浴中。
大酒店已經有七十七年歷史，但郭敬文就喺○二年先入大酒店，對於喺歷史悠久嘅公司做高層，郭氏話有利有弊，好嘅係公司歷史悠久，累積大把優質資產，加上早已建立品牌，談新項目就可以事半功倍，好似佢加盟大酒店後負責喺上海發展半島酒店，就係因為大酒店嘅品牌夠響，所以當地政府非常合作。至於弊嘅，郭敬文就講得隱晦啲，只係話公司有長遠歷史，管理層自然有佢哋嘅習慣。
傳真︰2623-9278
電郵︰[email protected]