郭可盈入行十二年，仍未拿過重要獎項，她表示看化一切，並謂現在先稍作休息，抽時間做一些公益活動，然後才再次投入拍劇工作。
戥廖碧兒唔抵
可盈說：「我以後拍劇盡量貴精不貴多，揀啲好劇本先拍，我想留番多啲機會畀新人。」可盈表示不介意與經驗淺的新人合作，她說：「我都做過新人，有時新人嘅表現好真，唔會為角色而演戲，同新人合作都有另一種火花。」
究竟可盈看好哪位新人呢？她說：「女仔方面我睇好廖碧兒同楊怡。」先談曾在劇集《心花放》扮演郭可盈妹妹的廖碧兒，可盈說：「佢好勤快，工作態度好認真，好似初出道嘅我一樣，所以佢喺台慶夜攞唔到飛躍進步女藝員獎時，我都有啲戥佢唔抵。」至於楊怡，可盈說：「佢古裝扮相好靚，演戲都唔錯，佢都算無綫嘅一線女藝員。」
讚趙文卓好正
男新人方面，可盈則看好剛奪得飛躍進步男藝員獎的黃宗澤，她說：「佢嚟緊呢半年陸續有劇推出，走勢好凌厲。」
有指可盈稍後會與趙文卓合拍無綫新劇《太極》，她說：「公司幾個月前通知咗我，當知道會同趙文卓合作，我重會同佢扮一pair都好開心，我一直好欣賞趙文卓，我覺得佢好正，好有氣質。」
可盈在公仔箱演了十二年戲，一如其他藝人一樣，等待機會晉身大銀幕，她說：「有機會當然都想拍戲，不過呢啲機會係可遇不可求，𠵱家大部份嘅戲都係一啲大間嘅經理人公司自己旗下有電影開，用嚟用去都係幾個卡士，將來有機會我最想同劉德華、任達華同梁朝偉呢啲好戲之人做對手戲。」