王天林在杜琪峯作品《黑社會》演極具江湖地位的老叔父鄧伯，誰想得龍頭棍做話事人，首先得過他那一關。現實裏，天林叔縱橫影壇六十載，執導的影片超過三百部，更得過亞洲最佳導演獎，七三年加入無綫又成為金牌監製，慧眼識英雄提拔了杜琪峯和林嶺東在無綫當編導，他看穿兒子王晶對電影製作有濃厚興趣，就引薦他在無綫當編劇。三位受他栽培的熱血青年，今日都成為獨當一面的名導演，他們的啟蒙老師在影壇被尊稱為「天林叔」，一樣是有江湖地位的老叔父，果真是戲如人生。
人老了特別怕寂寞，年屆七十八歲的王天林，前年底因老伴辭世，留下他與兩個女兒住在美孚新邨，每日起床時兩個女兒已出門上班，只留下菲傭在家照顧這位二百五十磅重、擁五十吋腰圍的老人家，所以天林叔喜歡去片場開工，在拍攝現場熱熱鬧鬧，與大家聊聊天，時間特別容易打發。日前在油麻地得如酒樓品茗的天林叔說：「拍戲酬勞多少，我一啲都唔計較，我鍾意有工開，唔使喺屋企咁悶，太太過咗身之後，真係好唔慣，啲仔女又忙，唔係成日可以陪我。」
借錢畀仔周轉
有四女一子的天林叔，眼中的子女每一個都很孝順，但他們因為各有自己事業，不可能天天獃在家陪他，對此天林叔很諒解說：「有時起身一個人都唔喺屋企，幾個月未見過個仔（王晶），掛住佢咪打過電話畀佢，點知佢又飛咗去北京，聽日又話去新疆，為搵食，個仔都幾辛苦。佢負擔都好重，又要撐住間電影公司，你估真係咁易撐呀，早幾年影市開始唔多好景，個仔間公司啲戲又唔係咁賣座，公司都周轉不靈。」
原來王晶每月給父親的家用，是透過公司會計部支出，曾經有幾個月，公司給天林叔家用都延遲了，他就感覺到王晶有事瞞着自己，天林叔表示：「當時我打電話問佢係咪經濟有困難，佢又同我死頂話冇，我都唔理佢，將自己啲積蓄入晒佢個戶口，後來佢知道咗，重同我講話唔使幫手，口講唔使，但結果咪用咗呢筆錢，唉！兩父子有乜計。近呢兩年佢經濟好番好多啦，事業都幾順，以前借我嘅錢一早就畀番我，而且每個月重畀好多家用我使，不過見佢𠵱家成日飛嚟飛去，我都心痛。」
憶亡妻泛淚光
王晶曾擔心父親悶，提議他再找另一個老伴，但天林叔婉拒了兒子的好意，他解釋說：「我都咁大年紀，重搵個女人返嚟做乜，到時搵個女人返嚟同我兩個皇帝女唔夾重麻煩，多一事不如少一事。我同太太有五十年感情，真係唔係其他女人可以取代。」天林叔回憶起妻子去世當日，一家人趕到醫院送她最後一程的情景，一時感觸眼泛淚光，可見他對亡妻仍未忘情。
現時每逢周六和周日，天林叔會與女兒去飲茶，下午會同友人搓十六圈衞生麻雀，他說：「我都係打三蚊六蚊，一舖牌上落幾百蚊，自己精神唔夠，唔敢打咁大，我試過幾次走雞冇胡食，重要出銃畀人，你話係咪激氣。如果每個禮拜開番兩、三日工，等個人有啲精神寄託，星期六、日就有牌打吓，又同啲仔女、孫仔、老友見吓面，我都冇求啦！」
劉偉強行運一條龍
「以前喺無綫年代，我已經識得佢，不過當年佢唔係跟我嗰一組，佢係跟另一個監製，所以喺電視台大家冇正式合作過，但我印象中佢都幾醒目，佢喺影圈最初係做攝影師，後來成功轉型做導演，佢都拍過唔少賣座片出嚟。我覺得呢位導演真係好好運，真係拍乜都收錢，早兩年佢拍嘅《無間道》我好喜歡，睇佢呢部戲就睇到佢嘅導演技巧。」
王晶識拍藝術片
「好多人話我個仔成日拍啲屎尿屁戲，其實佢一樣識得拍好嘅藝術片，當年佢喺邵氏就拍過一部文藝片，但因為唔收錢，對佢有一定打擊，佢就覺得為咗老闆着想，決定拍商業片為主。咁多年嚟佢拍咗唔少賣座片，呢啲片可能冇乜藝術成就，但票房證明觀眾係接受，近年佢拍嘅戲票房唔及以前，只係每個導演都有高低潮，我眼中王晶係一個好導演，佢永遠會先照顧老闆同觀眾嘅需求為大前提。」
王家衞太慢條斯理
「佢喺○三年搵過我拍《2046》，但當時我等咗差唔多一年，到佢通知我開工時，又因為我太太啱啱過身，我邊度有心情開工，結果都係拍唔成。不過我好好奇點解部戲要拍成五年，到我睇完呢部戲後，我真覺得部戲點拍都唔使拍五年，但部戲係拍得幾好。王家衞都係一位有才華嘅導演，但我覺得佢拍戲太冇預算，成日超時超支，不過呢方面，佢又令人好羨慕，可以有老闆義無反顧支持佢。」
杜琪峯影壇多面手
「差唔多二十五年前，佢離開無綫拍第一部電影《碧水寒山奪命金》，我睇完已經覺得佢拍得唔錯，非池中物，由離開無綫到電影圈發展咁多年，佢嘅導演技巧進步得好快好成熟，佢喺拍攝現場胸有成竹，完全知道自己要乜，而且佢拍嘅片種好多元化，喜劇、警匪、愛情同文藝片都識拍，加上佢拍戲從來唔受市場規限，鍾意拍乜就拍乜，創作空間好大，《黑社會》可以話係佢近年嘅佳作。」
吳宇森豪氣蓋青天
「佢拍嘅西片我已好少睇啦！但佢當年拍嘅《英雄本色》同《喋血雙雄》，我都好喜歡，吳宇森好擅長拍男性情義片，將肝膽相照嘅豪情發揮得淋漓盡致，基本上佢拍戲都幾流暢，拍大場面亦有一手，大場面係好蝦人拍，有好多導演拍大場面都未必有佢嘅功力，佢能夠成為荷李活大導演，呢啲都係香港人嘅光榮，雖然我同佢冇乜交情，但我都幾欣賞佢嘅導演手法。」
撰文：陳月媚 攝影：何國豪
龍頭棍提供：銀河映像
場地提供：得如酒樓
