沉寂咗一排之後，李超人旗下嗰檔3終於有動作，佢哋話即將推出新一輯電視廣告，重搵咗一男一女嚟自台灣同香港嘅「人氣」歌手親自演繹。3唔用黎明唔通嫌黎天王人氣唔夠？
想當年喺九三年，黎天王首次幫和記天地線拍廣告，有個叫阿May嘅向黎明獻花，黎天王重唱住《夏日傾情》；第二年第二代阿May扮間諜，黎天王一句「有緣嘅話，我哋會再見」趁住黎天王嗰首《哪有一天不想您》，當年傾倒不少少女。
着老西扮成功人士重好
之但係今時今日，成日換手機又捨得使錢玩3G嗰班後生仔，真係覺得黎天王好似上一代，尤其係C記有周杰倫、連稍為弱勢嘅新世界傳動網都有成班英皇歌手撐住，你係後生仔會點揀呢？
不過，八方知道黎天王同和記不嬲都無約，未來雙方都會合作，如果超人仍想用黎天王，八方有個提議，叫佢換番套老西，正正經經扮吓成功人士sell吓Blackberry咪幾好，點都好過響地鐵度跳嚟跳去啦！
講番個廣告，和記特登賣關子唔講主角係邊個，個男歌手淨係得個剪影，女歌手則遠遠影住個背住你嘅全身相，重叫人自己估，八方自問眼拙，唔知讀者估唔估到呢？
傳真︰2623-9278
電郵︰[email protected]