特首曾蔭權噚日喺禮賓府頒授勳銜，一班勳章或者獎章得主對於新裝修之後嘅禮賓府都感到好好奇，八方就終於見識到個價值三十萬嘅新魚池，同𠵱家當奴屋企嗰個差唔多大，就起喺公園側邊，周圍有啲假山假石同盆栽，佢至愛嘅錦鯉就重未搬過嚟。
禮賓府嘅外牆換咗淡藍色，圓拱形嘅窗框用咗鵝蛋黃色，屋簷就上咗光亮嘅啡油，八方就覺得幾新淨順眼，攞大紫荊嘅劉皇發覺得代表咗時代嘅轉變，攞銀紫荊嘅陳鑑林就覺得裝修得唔錯，但覺得手工唔係咁好，應該光滑嘅地方就凹凹凸凸，八方心諗，使咗成千萬嘅工程都搞成咁，納稅人呢鋪真係肉赤。
傳真︰2623-9278
電郵︰[email protected]