普選要循序漸進，這腔老調，已經彈過多次。既然有錢佬不斷重提，市民姑妄聽之。普選，自己會漸進，不用猛睇timetable，船到橋頭自然直。市民平常心，繼續下列活動，普選（和上帝）自自然然會來。（即興的上帝當然不會預先給你時間表。）
繼續呼吸。除非你是天眼通，死屍是沒機會看到全民投票那一天的。
繼續拍拖。有了對象，普選一聲令下通過，你不用問林瑞麟，即時拉埋天窗，唔使驚煲冇米粥。
繼續做生意。無論姓胡與姓曾，賣樓抑或賣呔，生人或者死人的生意，只要抱住長做長有心態，可加可減策略，應該可以捱得好耐，等得到2047。
繼續瘦身。惱恨自己超級肥婆的你，可以用普選做假想敵，2007至2012瘦唔成，可以將時限推遲到2017。再唔成功，還有終極2047墊底。最開心是，有民主派跟你一齊癡癡地等。
繼續炒樓。冇普選，中產就不會大逃亡，豪宅就有蠢蛋接貨，你就不會損手。
繼續生仔。三年抱兩對孖胎的話，到2047，你幾個仔都有資格競選下屆特首，你這個阿媽，肯定風騷過唐英年阿媽。
繼續黐線。發夢和發神經的副作用都是殊途同歸地咁「特敏福」，只要普選那條不是膠線，你即管日以繼夜地黐，斷估不會黐到跳樓。