馬主Ｎ喺星期三夜馬中，買重自己隻馬，一Ｗ五Ｐ（即一注獨贏，五注位置），呢招今季好掂，次次當收租，難得佢隻鐵馬忠心肯跑，不覺疲累，次次跑入前五名，今季已為佢帶來淨獎金六十萬元。唉！點知星期三晚就唔好彩咯，隻馬出閘遲咗，中途俾前面一隻馬頂住，事後先知道嗰隻馬流鼻血，騎師拉隻馬向外偏出打衝鋒，啱啱輸少少，得個第五名。騎師猛話「鎖你，鎖你，其實應該至少跑第三名」。鎖你都冇用啦，我哋啲大注位置輸晒，都唔知點樣去翻本。
馬主Ｎ福至心靈，狠心買落第四場冼博士隻「友誼第一」，贏到笑呵呵，但係好快就打自己一巴，因為佢唔記得第五場有一隻冼博士公子嘅「先機」，忽視咗。結果「友誼第一」派六點三倍，「先機」爆大冷派一百一十點九五倍，一口孖寶派（每十元）六千零二十三蚊，如果下注二串一就派六千九百八十九蚊。馬主Ｎ走晒大寶，呻到樹葉都落晒，因為「先機」馬主冼公子留學澳洲，正是馬主Ｎ嘅同期同學，憑感情分就應該買番十蚊孖寶啦！
你估冼博士贏咗幾多呢？以佢嘅身家，落注一千蚊孖寶，等於我哋買個菠蘿包，咁就係咁意收番六十萬以上。不過我哋知道冼博士素來富而有禮，鍾意拉頭馬多過鍾意贏錢，佢已經好耐冇拉頭馬咯，星期三晚竟然父子一齊贏，一晚拉兩次頭馬，笑到見牙唔見眼，開心過贏錢好多。
冼博士係珠寶界老行尊，與鄭裕彤、楊志雲等人同輩分，幫中文大學籌款好多次，佢位公子冼雅恩大家或者唔識，但好多人識得麥嘜漫畫，其實十幾年前麥嘜之得以面世，得冼公子助力不少。冼公子養馬唔係好耐，估唔到佢匹「先機」竟然爆出巨型冷門，更巧合嘅就係與爸爸「友誼第一」串成一口大冷孖寶。馬主Ｎ嘅賽馬記憶力驚人，連佢都唔記得以前有前科，冼氏父子可說創造咗賽馬歷史。