民建聯立法會新貴李國英買領滙股票單嘢爆咗出嚟，佢嘅黨友陳鑑林噚日攞完銀紫荊之後不忘幫佢辯解，話身兼房委會委員嘅李國英早排係「一時大意」先會買咗領匯，佢肯講出嚟係「誠實」嘅表現，又話李國英只不過係有一個房委委員嘅身份，同八方或者其他巿民都無乜分別。
八方雖然無仔女，不過都好擔心啲小朋友聽完之後以為「誠實」真係咁解，又或者覺得做風紀同其他同學無乜分別，明知訓導主任今日唔做突擊檢查就偷雞買鹹書返學呢？
講開又講，今年唔少勳章得主都係嗰類成日開口夾着脷嘅人，金紫荊得主楊永強攞獎之前就俾班沙士遺屬贈興，佢哋捉住楊永強沙士疫潮當日嘅金句「社區無爆發」，喺禮賓府外抗議。唔知楊永強會唔會覺得無癮呢？但八方就好明白班家屬嘅心情。
傳真︰2623-9278
電郵︰[email protected]