人做龜，我做龜，個個都係食魚糧大，我就唔同呢，我食雪糕大㗎！係咪好羨慕呢？鬼叫我係全屋至乖、至善良嘅龜咩，主人梗係錫晒我啦，成日畀好嘢我食！但係，因為我為食之過，搞到個PatPat愈來愈大，𠵱家想行快兩步霸個靚位曬太陽都行唔郁！
記者：杜慧妍 攝影：楊錦文
為食阿肥
任人騎牛牛
其實我並唔係主人想像中咁善良㗎咋，只係我太肥走唔郁，明明霸到個靚位曬個日光浴都要俾人搵笨騎牛牛，唉，鬼叫我行得慢，無得反抗咩。
16歲老大
身形大過你塊面
肥仔，讓開！輪到我老大同大家講兩句。唔講你唔知，我係呢間屋入面最得高望重嘅龜，皆因我年紀最大有16歲，算係陪得主人最耐啦。唔好以為主人淨係錫晒阿肥喎，佢都不知幾錫我呀！知我鍾意食蝦米同車厘茄就成日請我食，我先有咁大隻咋，身形重大過主人塊面！阿肥嗰種就叫做「肥」，我呢種就叫做「健碩」啦！知無？
叻仔學嘢快老大都敢騎
叻……我至叻……哈！終於到我出場喇。唔係讚自己，我真係幾醒㗎。話說幾年前我初嚟甫到，唔知頭唔知路，主人拍拍手個個都一窩蜂咁湧埋去，原本係開餐！嘩，第2日梗係唔執輸啦，一聽見佢拍手，我就第1時間搶閘！我見騎阿肥都唔反抗，𠵱家我連老大都夠膽騎呀！你話犀唔犀利？有佢哋做牛牛我唔使郁都可以周圍去，好歎呢！
6歲開始養愛龜如命
我哋嘅主人好鍾意龜㗎！睇吓佢間房咁多龜擺設就知啦！六、七歲就開始收養我哋㗎喇。記得佢同我哋講過，我哋重有幾個大哥哥大姐姐，不過好早已經死咗，搞到佢唔開心咗一排。好彩𠵱家有我哋14兄弟姐妹陪佢玩，佢好錫我哋㗎，好似草龜先天有缺憾，阿慈都無嫌棄佢，一直養到佢𠵱家差唔多10歲喇！
