近年世嘉雖然已經唔再推出主機，但其代表作《超音鼠》從來都冇絕迹Game壇，始終《超音鼠》喺動作遊戲上出晒名係速度感奇高嘅作品，並唔係其他遊戲可以媲美，最近《超音鼠》重攻佔埋NDS，最新作品取名《SonicRush》，利用雙屏幕令到版圖更加廣闊，打起上嚟就更加爽快！
記者：梁瑋瑜
上下芒齊打
今次《超音鼠》殺入NDS，大家都會好好奇，究竟佢會點樣用盡NDS嘅獨特功能呢？答案就係個雙螢幕喇！以前玩《超音鼠》，一個唔覺意失足，都只係會跌落同一個畫面嘅場景裏面，而NDS版嘅《SonicRush》所有嘅場景都由上下兩個螢幕組成，喺上螢幕度玩玩吓，一跌就可能落咗下螢幕，令到成個遊戲嘅內容同難度足足乘上兩倍，真係反應慢少少都唔得，玩起上嚟更覺刺激！
打大佬變3D
《SonicRush》採用傳統十字掣操作，同以往嘅《超音鼠》一樣，都係以橫向2D形式為主，特別嘅係去到打大佬嘅時候，畫面會突然變成3D，難度立即提高咗好多，好似小記打第一關嘅大佬，都需要諗吓計仔，絕對唔係輕易可以過關！
至於TouchScreen方面，Sorry！只係喺Bonus嘅小遊戲裏面先用得着，玩家要用支筆控制超音鼠嘅方向，避開障礙物，拎取金幣，雖然玩法簡單，但玩落都覺得幾好玩，或者世嘉方面可以考慮下次出一隻前向版本嘅《超音鼠》！
新增無線對戰
今集除咗超音鼠之外，重新增咗一個新人物「BlazetheCat」，用超音鼠打爆咗第一關之後，玩家就可以選擇用「BlazetheCat」模式嚟玩，基本上操作同超音鼠分別不大，而「BlazetheCat」玩嘅場景同超音鼠係一樣嘅，只係選咗唔同人物，次序就會唔同，想由頭玩到尾，定由尾玩到頭，就由你自己決定！
除咗個人作戰之外，《SonicRush》重加入咗無線對戰模式，玩家會同對手喺同一個情景鬥快去到終點，中途拎到寶物嘅話，唔單止加快自己進度，重會阻礙埋對方，十分之有趣！
機種：NDS
種類：動作
售價：$258
查詢：CAPCOM（23661001）
(C)SEGACorperation2005.AllRightsReserved.