開賭場係唔係一定賺到盤滿缽滿？好多人都以為係。其實只要有競爭，一個地方只要有三間唔同公司經營嘅賭場，開賭場老闆未必賺到笑㗎。澳門銀河娛樂場嘅母公司發行債券，發售文件提供嘅資料就顯示，銀河賭場今年上半年盈利倒退81.4%（與○四年上半年比較），只係賺咗一千三百五十萬啫，與一般人以為賭場可以日進斗金嘅期望，有好大距離。
不過打工仔如果唔賭錢嘅話，去澳門贏錢嘅機會好大噃。澳門為咗興建賭場與酒店，拚命趕工，澳門根本冇法子提供大量工程師與技術工人，要靠外勞，咁就益咗好多本地建造業專才，佢哋紛紛去澳門打工，一啲索性喺澳門住，一啲就早出晚歸，日日坐船來回，唔係好遠啫，坐飛翼船個零鐘頭之嘛，我哋父執輩以前由梅窩搭船返中環返工，起碼都要咁耐啦。
謝師奶老公係機電工程顧問公司要員，周圍「撲人」過澳門開工，佢話極度需要機電工程師喎，澳門啲新建酒店，郁吓都話有三千房間，每間酒店都需要機電人員開工，有乜法子唔到處搶人？機電謝一方面掛住去外面搶人，另方面就嚴防自己人被搶，日日都唔知幾緊張。
澳門吃正條賭場水，單講建築，就會有三、五年好景，呢輪計劃中，興建中嘅拉斯維加斯式賭場、酒店落成後，就輪到維修人員好景。當然，最大未知數就係有咗六萬間酒店房間（多過今日香港酒店房間總和）之後，點樣可以每年招待到近二千萬遊客到澳門住宿兼賭錢，到時賭場酒店之間嘅競爭會相當劇烈，實會有人歡喜有人愁，唔會話間間賭場都賺錢似何鴻燊。
世事嘅嘢好難預料，今年九月開學前，知道一位大學講師退休，佢來自澳門，與好多澳門叻仔叻女一樣，當年千方百計來港攞身份證唔返去澳門，估唔到佢退休之時，香港好多人想攞澳門身份證！