《經濟一周》噚日喺中環麗嘉搞咗個酒會，頒獎畀二十二間有傑出表現嘅上市企業，重特登請咗行會新貴──中信泰富董事總經理范鴻齡、立法會議員梁劉柔芬、總商會快將離任總裁翁以登、財經事務及庫務常任秘書長何鑄明等做主禮嘉賓。
范鴻齡一見到八方，就話日日都有捧《蘋果》場，之後見到主辦負責人，又即刻話周不時都有睇《經濟一周》，果然係八面玲瓏。范總話，好嘅企業除咗要識賺錢，受股東歡迎之外，最重要係有好嘅管治能力，所以佢今日恨不得係來領獎，而唔係來頒獎囉！
梁劉柔芬同翁以登上台致辭時，就即席示範兩文三語，梁太本來齋講廣東話，之後見到在場有好多老外，即時以英語講多次；緊隨其後嘅翁以登見狀，有樣學樣，不過就係講完廣東話，再講普通話，話要照顧吓國內嘅賓客。
傳真︰2623-9278
電郵︰[email protected]