美版XBOX360開賣咗幾日，香港Game迷等到頸都長，傳聞噚晚會有小量美版機落場，點知大家都撲了個空！
江湖傳聞，好多Game舖都訂咗一部半部「美版水」看門口，不過啲水貨佬臨時甩底，話美版機要玩美版Game，驚香港冇乜市場所以最終「拉倒」，而且重講到明係遙遙無期嗰隻，叫大家無謂等喇！不過亦另有一個傳聞，由於有人唔希望見到有人賣「水機」，所以一眾水貨佬馬上懸崖勒馬，撒手唔入貨，孰真孰假？大家無謂深究，咪當古仔聽吓囉！
雖然全香港都冇人敢入貨，但據知喺深水埗黃金商場，竟然有人發現美版XBOX360蹤影！據知此機是美國開賣第一日嘅「首日機」，並馬上搭飛機「手提」返嚟！一機連14隻Game，「同業拆機價」都要上1.5萬！所以好多Game舖都話太貴唔敢入貨，傳聞輾輾轉轉下去咗黃金；不過就話明此機只作展示用途，多多錢都唔賣！如果大家想一睹XBOX360真機風采，一定要去深水埗行吓！另外，現場重話接受美版水XBOX360預訂，不過細問下，賣幾錢？唔知！重要係「或者下星期一」到貨，正所謂眼為實，大家都係要睇定啲！
文：AVMAN