趙飛雲沽清手上窩輪，唔使好似貼身膏藥黐住個市，噚日歎茶遲咗上股票行，入到去嘈到似街市，原來領匯（823）首日上市大幅高開近9%，第一口價做11.20元，之後重節節上升。
有認購者當然喜出望外，拍手叫好之餘又話訂枱食飯慶祝；無認購者就大歎走雞，怨天怨地之餘，又怨美國聯儲局11月1日的息口快將見頂會議紀錄內容冇早啲公布。另外有人發表投資偉論，話佢長捧港府場，由盈富（2800）買到領匯都賺錢，封曾蔭權做佢偶像。總之領匯出人意外的強勢，為股民帶來一陣亢奮。
不過，港股就唔係一陣亢奮咁簡單，噚日雖然最終都要跌兩點收市，報15081，但全周計則升198點，升幅1.3%，連續第4周升市，由低位計，已經反彈超過800點。
由周線圖睇，恒指重返20周線（14884）之上收市，下一個目標將是今年高位15509，亦是周線圖保歷加通道頂所在。下周二期指結算，好友如果肯加多兩錢肉緊，大市或有機會逼近15500水平。由日線圖看，恒指尚未完全補回10月6日的下跌裂口15138，重未為挑戰15500完成最後部署，大家在看好之餘仍需留一點戒心。
冷板電盈踢中鋒
港股昨日主力似留氣，由聯通（762）及長期坐冷板的電盈（008）踢雙中鋒，前者升3.9%，收6.65元，為恒指貢獻10點升幅，後者升3.1%，收5元，貢獻3.2點升幅。如果係大淡友，一定會話藍燈籠蒲頭，大市已經升到尾。
趙飛雲