昨日，係大中小戶皆大歡喜嘅日子。領匯（823）年尾送大禮，大派金錢，大戶唔在講，小股民即使得嗰幾手，都笑住咁沽，賺得好開心。
領匯以上限10.30元定價，暗盤10.50至10.80元，市場亦多預期會以呢個位開出，但噚日對價時，已經造11.20元，令一眾揸家喜出望外，跟住重扶搖直上，以11.80元收市，比招股價高出1.50元。散戶申請領匯有折，賺得重和味。
噚日個市基本上係反覆爭持格局，恒指收市微跌2點，調整一吓，好正常，成交231億元，淨係領匯已造咗77億元。上升股隻（不計認股證）比下跌股隻多，投資者信心有轉強之勢。
大市雖然調整，但地產股個勢仍然好強，長實（001）最威水，一度升上82.80元，收82.35元，仍有0.40元進帳；其他如新地（016）、新世界（017）同信置（083）等，屹立不倒，買家吸納得好積極。期指結算完之後嘅升浪，地產股會擔當好重要角色。
盈利可高速增長
加息周期接近尾聲，樓市看好，國際大財團睇準時機，亦開始入市，以美國雷曼兄弟基金為首嘅財團，就斥資7.8億元，購入觀塘的保華企業中心，係息口預期會見頂後較大型的工商綜合物業交易。除雷曼兄弟基金佔50%權益外，財團的成員還包括鍾楚義為大股東的資本策略（497）同保華建業（577），各佔25%權益。
資策近年活躍物業市場，以「快而準」方式買賣而獲得厚利，加上租金和股息收入，令盈利可高速增長（往績PE僅6倍），今次同雷曼兄弟聯手收購，揭開集團與國際大財團建立策略性合作關係嘅序幕，日後會有更多大動作。
資策睇中保華企業中心，主要係APM開業後，成功滙聚人流，令觀塘已蛻變成為新的商業區，而市區重建局公布涉資百億元重新發展裕民坊嘅計劃，將會令觀塘嘅發展更為急速，該區物業亦會更具升值潛力。
資策由今年3月底的高位1.58元回落，近日在1.10元覓得支持，可小注吸納持中線，暫時50日線（1.18元）會有阻力，升破後初步可向1.40元推進。
郭兆誠