知道葉選平個乖姪女靜子會出席「擁抱吉祥──西藏珍寶展2」，八方噚日一早去咗會展，見吓呢位可愛小姐點解咁本事，連大昭寺兩幅從未出過寺門嘅刺繡唐卡都運到嚟香港展出。
靜子確係人見人愛，怪不得當年傳阿松想追求佢，現場所見，係男仔都忍唔住多睇佢兩眼，同唐卡一樣咁吸引。靜子剛由西藏高原回來，前兩日身體有啲不適要休息吓，八方問佢好番未？佢笑笑口話：「冇事啦！」佢噚日紮起咗啲頭髮，披住件顏色好鮮豔短外套，腳踏一對白色皮靴，好嬌俏。佢話件外衣係苗族姑娘出嫁時着嘅，所以特別亮眼。
已嫁王震之孫王京陽
起初，靜子一見到八方同壹仔個記者反應好大，猛話「好驚好驚」，跳開唔肯接受採訪，不過後嚟傾到個展覽，佢就輕鬆得多，向記者介紹啲難得一見嘅展品，特別係唐卡，大昭寺講明只此一次。原來靜子用心良苦，佢話好多人冇法去拉薩，所以今次成功將稀世珍品運嚟香港展出，算係還個心願。
靜子係今次展覽承辦機構星際文化集團嘅營運總監，中英文都掂，不過，有位西報記者問佢啲好基本嘅問題，佢就氣到跳起，話個記者冇做好功課，又話網上都有晒資料。
今次展覽所得嘅收入，都用作保護文物，屬慈善性質，靜子同佢位執行董事陳嘉賢都係有心人，亦好低調，噚日冇請到任何一個特區高官嚟主禮，據說係因為上次太混亂。
唔好睇靜子跳跳紮，原來佢已經結咗婚，佢先生係中共元老王震個孫，叫做王京陽，兩人重有一個男孩子。咁就真係門當戶對喇，因為靜子阿爺係人稱葉帥嘅葉劍英，當年緋聞，當係笑話算吧啦。
八方以前採訪兩會，成日都見到靜子伯父葉選平，遂請靜子代為問候，靜子話葉老下個星期慶祝八十二歲生辰，所以佢會同「平伯」祝壽，佢口中嘅爸爸、嘅平伯，都係葉選平。香港人當然記得呢位前廣東省省長，大家都係廣東人，始終親切啲嘅。
傳真︰2623-9278
電郵︰[email protected]