最近開始翻風，又令人諗起食火鍋的時候，三五知己圍爐「烚烚吓」，的確係一件賞心樂事。不過「有鍋同享」最大唔好處，就係一齊洗筷子，𠵱家病菌咁勁，一個唔小心分分鐘就交叉感染，所以比較衞生的一人一爐愈來愈流行。珠海就有火鍋店，唔只一人一爐，重以火車做包裝，帶客人走一轉配料大巡遊。
記者：逸濠
攝影：高倫
Model：Ada、Pillow（Thegroup）
鳴謝：關鍵旅遊
自玩百變湯底
香港一人一爐火鍋，最便宜在快餐店食，配料不多，埋單都要$40以上，有時遇上食量大一點，分分鐘亦「唔夠喉」。珠海最近就開了一家全新的旋轉火鍋店「鍋之旅」，有些似迴轉壽司，以火車做主題，火車頭拖住一列運輸卡，全部載住各式新鮮火鍋配料，單係睇到已令人興奮，好似置身於一個火鍋配料大巡遊一樣，而「旅費」只須¥38，免收加一，一人一鍋任食，汽水亦任飲，重每人贈送啤酒一支，去開珠海可以試試。
小記最欣賞呢度配料夠多，花些少心思，隨時配出不同的湯底，可以白菜、雪梨配豬肺，變「潤肺湯」；藥材湯配鮮雞變「滋補雞湯」；番茄薯仔配……
鍋之旅
地址：珠海市鳳凰北路1056號（郵政大廈旁商業酒店二樓）
電話：（86）756-2222482
時間：11:00am-10:30pm
收費：自助火鍋全日每位¥38（限2小時）
交通：拱北乘2路或九洲港乘26路巴士至郵政大廈，空調車¥2。
同皇上食御宴
珠海唔只菜式選擇多，食之餘搞氣氛亦有一手，下午試過火鍋美食之旅之後，夜晚可以試吓同皇帝食飯。珠海賓館的「御膳閣」，是專門搞宴會的中菜廳，之前已做過「長今御膳」，而最近裝修過之後，推出一個「宮廷帝皇鮑魚御宴」，唔單止可以在宮廷裝修的大廳內，食到一些有宮廷Feel的宮廷菜式，更加有宮女同「公公」在場服侍，中途「皇上」更加會出來跟「眾卿家」敬酒，認真排場十足，所費無幾有如此享受，重想點。不過如果下次推出皇帝殘廢餐就更好。
珠海賓館御膳閣
地址：珠海市景山路
電話：（86）756-3333718內線2435
時間：須預訂，在客人指定時間開席。
交通：拱北乘2路或九洲港乘26路巴士至珠海賓館，空調車¥2。
欣賞笨豬跳
白藤湖鱷魚島是珠海市出名的旅遊景點之一，雖然已經開了多年，但如果未去過的話亦可以去睇吓，園內有十多個鱷魚池以養揚子鱷及泰國灣鱷為主，最意想不到是揚子鱷以前被人稱為「蛟龍」，但原來呢條「蛟龍」馴過貓，只要付出¥5就可抱住影相。
豬仔運動會係近年最多人睇的一環，睇住一群「笨豬跳水」，跳完上岸後牠們嚇到「拉糞」，就明白搵食艱難，在人、豬世界都係一樣。如果講好玩，買包薯片餵馬騮，都可以令人開心半日。
白藤湖鱷魚島
地址：珠海市白藤湖鱷魚島
電話：（86）756-5567520
時間：9:00am-5:30pm
收費：成人$28，小童$15
交通：香洲總站乘609路巴士白藤湖旅遊城下車，空調車¥8。
珠海至豪溫泉
天氣漸漸涼，加上食完御宴，最好浸個溫泉幫助吸收，講到浸溫泉，在珠海就一定係去充滿日式風呂Feel的御溫泉。除了設計夠豪外，泉水亦係真正溫泉水，加上有不同的藥用泉，又有古法太醫式按摩等配套，放兩日假飲飽食醉鬆一鬆至正。
御溫泉
地址：珠海市御溫泉度假村
電話：（86）756-5797128
時間：24小時
收費：¥128（以入場24小時計算）
交通：香洲總站乘609路巴士直達，空調車¥8。
自己去：香港至九洲港普通等$180。（珠江客運：28583876）
跟團去：珠海宮廷黃帝鮑魚御宴、火車頭旋轉火鍋兩天團。
成人星期一、三、日$399，星期五$449，小童一律$299，另每人兩天合共$100小費。（關鍵旅遊：23622022）