領匯（823）掛牌，高收11.80元，較發行價10.30元高出15%。成交金額77億元，佔大市總成交33%。
領匯窩輪喺本港尚未出世，喺星洲則有3件出爐。情況一如建行（939）喺上月27日上市，嗰便即刻有建行C輪爬頭登場。星洲嗰便啲例，睇住本港嚟做，諗計仔同本港搶奪優勢。本港可唔可以靈活一啲，放寬一吓，等C輪同日上市，等啲炒家多個檔口玩玩？領匯昨日開出後，步步上升，星洲3件領匯C輪亦係，早段低位上車，到收市時已經有24%至41%進帳，同發行價比較升幅更勁。
星洲領匯C輪823W：最低33仙（坡紙．下同），高收46.5仙，較發行價24.9仙高出87%，厲害。明年6月夠鐘，溢價2.8%，槓桿率5.5倍（有效4.9倍），引伸波幅23.5%。
星洲領匯C輪823W2：最低35仙，高收43.5仙，較發行價23.65仙高出84%，又係厲害。隻輪明年6月尾夠鐘，溢價4.2%，槓桿率5.9倍（有效4.8倍），引伸波幅25.7%。
星洲領匯C輪823W3：最低32.5仙，高收41仙，較發行價22.64仙高出81%，又係有人賺到笑。明年10月夠鐘，溢價10.2%，槓桿率6.3倍（有效4.3倍），引伸波幅29.3%。
3隻領匯C輪每隻成交有23球至52球。暫時數據最靚嘅係823W。冇用吖，散戶冇幾多有星洲關係，連輪價都唔知，點做嘢？
如果有領匯C輪昨日喺本港掛牌，肯定已有散戶撈嘢，𠵱家得個恨字，賴咗本港「執輸」措施，少咗搵錢機會。
章盛