交行（3328）早前打咗個小冷震，因傳出有芬佬沽貨鬆人，埋單計數做年結。但噚日高盛出報告再唱好交行，重申隻股可以跑贏大市，目標價3.94元。午後亦見高盛買盤出現，在3.35元排晒長龍接貨，似足新股上市需要保薦人護價咁款，建行（939）亦見瑞銀在2.575元排長龍接貨。Cookie就話，下周建行可申請發行輪，相信接貨行動與兩股發輪有關係。
噚日市場焦點在領匯（823）身上，今次阿虎唔得閒落柯打認購，否則應該至少分到3手，3隻金牛可袋袋平安。本港第3季經濟增長8.2%，打爛晒唔少分析師嘅眼鏡，全年經濟增長預測調高至7%，真係拍得住起飛中嘅中國。雖然財爺仍然唔肯承諾減稅，但港府如果年年拆啲公營資產上市，每次市民分到三兩手，執佢一萬幾千，即使唔減稅港人都會好開心。
領匯帶挈越投
領匯牛氣沖天亦帶動有REITs分拆上的越投（123）造好，此股噚日復牌平開0.88元，落過0.87元，如果眼明手快，仍可以在較低位上車，應該有幾個位執吓。
越投今次拆REITs上市，估計可套現24-32億元（相當於每股套現0.375-0.50元），獲利15-21億元（相當於每股賺0.234-0.33元）。分拆後，越投仍持40%基金單位權益，以及其他包括物業發展、管理及投資、造紙及收費路橋的業務。
唯冠（334）噚日勁升27.84%至0.62元。據聞有芬佬趁低吸納，而日立控其侵權案件應該就快搞掂，前景轉明朗。
阿虎