昨日焦點一定係領匯（823），隻股話就話認購冇舊年咁受歡迎，但其實仍有好多散戶捧場，首日掛牌表現遠超預期，好多散戶即時沽出賺錢皆大歡喜。
經紀黃就話，美加息潮估計好快告終，領匯噚日收市雖然較招股價高出14.5%，但計落仍超過5厘息，所以有芬佬肯吸納，為呢隻基金提供強力支持。
另外，年結將近，好多芬佬開始點算緊自己個投資組合，睇吓將有幾多花紅落袋。經紀黃話，如果芬佬今年揸住一啲同大陸消費有關嘅股份，肯定好安樂。恒安（1044）今年升幅驚人，但有芬佬話佢高處未算高。
恒安上市多年，由生產女性衞生用品同尿片起步，近年則銳意發展紙巾市場，至今各方面業務皆在大陸市場佔有重要地位，每年營業額增長迅速。恒安由年初4元水平升上，現價8.30元，升足1倍有多，預期PE已高達21倍，但由於仍處於高增長期，加上原料如紙漿等價格預期見頂，所以芬佬繼續睇好。
慕容小初