陶大宇當年憑現時半夜重播的無綫劇集《刑事偵緝檔案》系列而被譽為師奶殺手，獲近四十萬觀眾深宵翻煲他與梁榮忠飾演的幹探屢破奇案。對於忠仔偷食而與女友鍾麗淇冷戰中，大宇即獻箍煲妙計，他笑說：「使多啲錢，將層樓轉名啦。」
無綫近期半夜重播陶大宇、梁榮忠和郭可盈十年前合演的經典舊作《刑事偵緝檔案》系列，劇中大宇飾演的張大勇與忠仔所飾的義仔，兩位合作無間的神探屢破奇案，平均亦獲近四十萬觀眾深宵翻煲，再睹當年大宇憑參演《刑偵》而贏取師奶殺手稱號的風采。
盡快平息風波
大宇與忠仔除了是劇集拍檔外，更曾齊往南極拍攝旅遊節目《南極追蹤》，在冰天雪地下同度困境。對於早前忠仔與朱慧敏車廂激吻而令形象受損兼激嬲女友鍾麗淇，要面對自己人生路上的另一困境，日前大宇在銅鑼灣接受訪問時說：「呢段時間佢要乖乖地，生生性性，𠵱家係佢最痛苦嘅時間，真係男人最痛，日後有乜嘢事，又被人掹番出嚟講，𠵱家佢要箍煲，作為一個女性，鍾麗淇好冇面㗎。」大宇又笑說：「忠仔係醒目仔嚟嘅，要諗好多辦法箍煲，使多啲錢，𠱁佢開心，努力搵錢囉，將層樓轉佢名啦。」
大宇表示曾跟忠仔通過電話，希望對方盡快平息事件，而早前他出席友人婚宴時曾與鍾麗淇碰面，他說：「我叫佢takeiteasy，都大個女啦。講真呀，我唔係同忠仔講說話，人一定做錯嘢，佢捱咁耐，再返無綫得到好多嘢，都戥佢開心，點知突然間嚟個大風暴，對佢好鬼傷㗎。」
妙談可盈整容
問大宇會否覺得忠仔偷食事件會令事業一鋪清袋？他說：「我覺得唔會，係條路難行咗，佢叻仔嚟嘅，但呢鋪叻過龍。」
《刑》劇女角郭可盈由當年臉圓圓演變至今日瓜子口臉，故一度惹來整容疑雲，對此大宇只笑說：「佢從來冇同我講（整容）喎，我又唔反對嘅，畀我就唔會，適可而止啦，佢係成熟咗，始終都係瘦嘅。」
服裝：Benetton（牛仔褲為藝人私物）
場地：GoGoCafe
電單車：恒基車行有限公司
