電訊行頭賣盤傳聞沒完沒了，尤其係盤數唔見得人個陣，更加會俾人寫到即刻要賣咁款；好似電訊魔鬼王維基檔城市電訊，勁蝕兩億，即刻俾人摷番傳足兩年嘅賣盤舊聞勁講。老王噚日同八方講，除咗老婆同仔女唔可以賣，乜嘢都有個價，就連佢視為親生骨肉嘅城電都係，只要好價，都可以割愛。之但係咁，如果真係要賣，都揀兩年前股價喺四五蚊嗰陣放手啦！呢個時勢，試問可以賣畀邊個呢？再者，就算面對激烈競爭，就算唔起網淨係收客都重有得做，又唔係走投無路。
至於嗰啲成日話佢唔掂嘅分析員，老王話，假如佢哋真係咁堅，都應該自己搞咗間好掂的公司，唔使喺度分析人哋檔生意啦！都幾寸，但又有啲道理嘅。八方有預感，老王檔嘢有排都唔使旨意會有人唱好，因為……道出真理係要付代價囉！
傳真︰2623-9278
電郵︰[email protected]