亨達噚日開記招，同傳媒總結一下今年股市，又展望吓來年景況。身兼聯席董事及研究部阿頭嘅黎偉成本來係行家，佢同華華講，呢個會係每年12月嘅指定動作，今年提早喺11月尾舉行，因為佢要放大假，為免心掛掛，就早少少了咗件心事囉！
黎董事猛話今年市道好咗，多咗人跳槽，係得佢冇被人挖角。佢哋個部門就梗有影響，家吓個個月都有人出出入入，所以今日除咗講市況之外，重介紹新人畀傳媒認識一下。黎偉成講嘅新人係周嘉偉，只係返咗工幾日，連卡片都未印好，睇嚟佢個部門人手真係好緊喎！
講番個市，黎偉成下年睇好思捷環球同大新金融，但對地產股就唔係太樂觀，主要因為息口重會有得升，而樓價有機會再跌15至20%。