【浙江直擊】荷李活巨星湯告魯斯（TomCruise）主演的西片《職業特工隊3》，昨日在浙江的千年古鎮西塘拍外景，百人攝製隊不惜工本封鎮拍攝，並由兩名A貨靚佬湯多次試位後，正牌靚佬湯才親自上陣，演出飛簷走壁的驚險鏡頭。
荷李活巨星湯告魯斯日前偕未婚妻姬蒂荷姆絲（KatieHolmes）抵達上海，經過兩天的高級自由行後，昨日靚佬湯已收拾心情，投入拍攝西片《職業特工隊3》。
封鎖古鎮
半百公安武警把關
昨早約七時，靚佬湯在八名保鑣護送下，離開下榻的上海四季酒店，乘坐保母車前往車程約九十分鐘的浙江千年古鎮西塘拍攝外景。由於攝製隊一早已向有關方面申請封鎮五天，故多日前西塘古鎮已知會旅遊局及在網上發出聲明，指在此五天之內取消所有旅遊行程，店舖亦會暫停營業，昨天現場更保安嚴密，有半百公安及武警分布古鎮各處維持秩序。
靚佬湯抵埗後即開始做準備工夫，工作人員則忙於裝威吔、鋪軟墊、打燈及整理鏡頭等，現場所見，外籍工作人員約有三十人，連同其他內地聘請的工作人員、民工及特約演員，人數逾百，相當大陣仗。
長途跋涉
即日往返上海慰妻
昨日大隊主要拍攝靚佬湯在古鎮內飛簷走壁的驚險鏡頭，劇情指他揸槍逃亡，由小巷跑到古屋露台，再在高度參差的瓦片屋頂上跑跳，最後沿屋頂跳到石橋上，動作頗具難度。為策安全，導演先安排兩名A貨靚佬湯到屋頂試位，其中一名穿短袖黑衣的替身激似真身，幾可以假亂真。兩名替身輪流試位約三十次後，至下午約二時正牌靚佬湯才告上陣。
化了妝的靚佬湯，額角、鼻樑及臉頰均塗上血漿，當他步往拍攝位置時，在場內地工作人員及部份商店員工均夾道歡迎，表現興奮，不斷爭相拍照及索取簽名，而靚佬湯亦笑容滿臉地揮手示好，態度友善。
其後靚佬湯登上屋頂細聽導演及動作指導講解，並親自視察環境及度位，另一邊廂的公安則開始驅趕人群，清場準備拍攝。
據知身高一米七的靚佬湯其中一名替身的身高達一米七五，比正貨還要高，而靚佬湯拍攝前都會穿墊高的鞋上陣。由於拍攝工作順利，故大隊未入黑已撤離古鎮返回上海，相信是由於靚佬湯要趕返上海慰未婚妻，加上古鎮酒店設施不及上海，故大隊寧選擇長途跋涉即日往返。
江南水鄉
商戶賣靚位賺外快
今次靚佬湯到西塘拍電影，亦帶挈部份古鎮商戶賺外快，例如附近的酒家碰巧佔觀景有利位置，即以看靚佬湯拍戲為噱頭，將二十元人民幣一杯茶的窗台座位，坐地起價至每杯一百元人民幣，認真識搵錢。
《職》片取景的千年西塘古鎮，被譽為江南水鄉，荷李活老牌女星梅麗史翠普（MerylStreep）過往就曾舉家暢遊此地，著名小說家金庸當年遊西塘時，更曾親自題字，而李嘉欣去年主演的劇集《畫魂》亦是在西塘取景。
採訪、攝影：娛樂突發組
