噚日係已故填詞人黃霑嘅忌辰，佢個女黃宇詩噚日喺尖沙嘴擔任一個聖誕活動嘅司儀。宇詩提到霑叔逝世一周年時話：「冇做乜特別拜祭，因為我間中都會去拜佢，我每日都好掛住爸爸。噚晚凌晨諗起舊年嘅情景，都已經接受咗，要喊都喊晒。」
秘密安放骨灰
霑叔好友倪匡早前話唔知黃霑嘅骨灰放喺邊，所以去唔到拜祭，對此黃宇詩話：「爸爸在生好健康時提出過意願，想將骨灰撒入大海，我哋一家人已經將爸爸意願做咗，一半骨灰撒入海，一半留番低。因為爸爸有太多好朋友，佢嘅骨灰放喺邊，只有屋企人先會知。」
而霑叔前妻華娃噚日同關菊英出席「群獅金禧情牽半世紀演唱會」嘅記者會，會上公布獅子會成立「顧嘉煇音樂創作人基金」，呢個演唱會嘅部份收益會撥畀呢個基金。噚日係霑叔死忌，但華娃有啲迴避咁話：「唔知喎，唔記得咁耐嘅嘢啦，𠵱家做呢個演唱會好大壓力，我最驚忘記歌詞同甩嘴。」早排林燕妮話遺憾做唔到霑嫂，噚日問華娃重嬲唔嬲佢當年搶咗霑叔？華娃笑住話：「我𠵱家正一係芸娘，一嚿雲咁，今日做過嘅事，聽日都唔記得啦！」
