全國人大常委曾憲梓前日話，相信有生之年都可以睇到普選，呢一句說話，𠱁到達仔開心咗成日，因為自己比曾老年輕，換言之自己百年歸老之日，都一定睇到普選，諗起都要笑一笑，重話噚日食飯都食多咗喎，真係誇張。
劉江華聽到，又忍唔住加把口話，曾老係長壽相，達仔都係福相，相信佢哋齊齊望到普選，搞到坊間一致唱好，達仔一定開心得幾錢重。
不過，八方就勸達仔唔好開心得咁快，事關第一，睇吓中央以至特區政府對政改方案，最近都係採取軟皮蛇政策，講到好似過咪過，唔過咪算數，完全唔緊張咁嘅款。呢一個可能係政府同民主派討價還價嘅伎倆，但係如果真係咁嘅態度，特區政府又點會有普選呢？其次，現代人都好長壽，分分鐘百幾歲都有之，達仔都係唔好食咁多飯，希望愈大，失望愈大呀。
傳真︰2623-9278
電郵︰[email protected]