吳文忻日前跟隨武術教練伍允龍習劍，見嬌滴滴的她舞得頭頭是道，二人凌空飛躍格劍，儼如拍武打片。談到近日湯盈盈憑李笑好一角而人氣急升，吳文忻謂亦有意仿效，以洗花瓶形象。
吳文忻日前在北角半山跟隨吳建豪的武術教練伍允龍學劍，由於她有跳中國舞底子，故經指導下，瞬間已掌握要訣，見他們又跳又彈凌空格劍，劍來劍往儼如拍武打片一樣，雖然實際欠奉，卻非常睇得。
伍允龍對吳文忻學劍讚不絕口，他說：「文忻好有潛質，有跳舞底，唔使點教，執執甫士就得，但真係學就要用啲時間，佢可以㗎！以女仔嚟講，佢梗係OK，有啲力，學武術發勁係好緊要㗎。」
玩兇殘手球
吳文忻則笑說：「實唔實際冇所謂，又唔係打人，我第一次跟人學劍，幾好玩呀，同我以前學跳中國舞嘅功架差唔多，有底子就可以融會貫通。」
吳文忻又謂曾向朋友和導演提過自己身手靈活，但卻無人相信，她說：「次次都冇人信我嘅，啲人實講睇你個樣姐手姐腳，點打呀？其實我細個已經打手球，手球係種好兇殘嘅運動，我學跳舞，由小學一年班學到中學，我至鍾意郁手郁腳，紮紮跳冇時停，同外表好唔同。我重諗住跟Phillip（伍允龍）學詠春，防吓身又可以裝備自己，唔想一味做花瓶。」
「唔想有局限」
近日湯盈盈憑劇集《阿旺新傳》醜女李笑好一角而平地一聲雷，吳文忻因此想改形象，她說：「盈盈係個靚女，身材又好，之前佢畀人感覺都有啲性感，有監製肯用佢做醜女，結果成功咗，我都唔想有局限，希望學多啲唔同嘅嘢，等有機會時大派用場。」
採訪：朱倬誼 攝影：陳偉權
