傳統的全羊宴非要到蒙古吃不可，不過羊奶、羊內臟用原始方法烹調，羶味勁到頂唔順。同樣是蒙古羊，混合了日式烹調法，製成如懷石料理一樣精緻的套餐，羶味減半、滋味倍增。還有海南省著名的東山羊和新疆著名的黑草羊，食法嶄新，成為秋冬最佳的暖胃食物。
記者：黃潔蓮
攝影：楊錦文、黃子偉
Model：Ren&Zoie（PureModel）
扮片皮鴨夾住食
全羊宴套餐內8道菜佔一半都是以羊為主，包括羊柳做的冷盤口水羊卷肉貢菜、羊肚做燉湯，最大賣點是那隻羊髀，先由侍應將羊髀片皮，像吃乳豬和片皮鴨一樣夾着麵皮來吃。剩下的羊髀肉則起肉炒，做成生菜包。羊髀已加香葉、青簍葉及胡椒等醃足3小時，所以起肉切粒也不用加任何調味料，加上選用蒙古羊髀，就算燒足1小時，肉都不會韌。最後吃一碗桂花酒釀丸子，清清味蕾兼解燥下火。片皮蒙古烤羊髀餐每位$168（2位起）。
怕全羊宴太燥，可以單叫一個羊腩煲。大廚以日本白麵豉爆鑊炒香羊腩，然後再加入清酒燜，上枱時還附有一樽清酒，可隨意加入。「試過好多種麵豉，最好都係紀州產嘅白麵豉，煮出嚟有甜味，而且唔會蓋咗清酒香味。」加多$12叫一客中式生拉麵，放進煲裏燜煮3至5分鐘，好味到連汁都撈埋。
懷石清酒羊腩煲$78
口味清新獨特的羊腩煲，以清酒和白麵豉燜足3至4小時，伴豆腐、生菜和金菇一齊食，完全日式食法。
松茸古法燉羊肚湯（套餐）
切絲的羊肚加圓肉、杞子、北芪及松茸，燉足6小時，鮮味濃郁。
口水羊卷肉貢菜（套餐）
以口水雞的醬汁製法，醬汁微辣帶麻香，是混合了桂林醬、麻醬而成，還附有一碟即磨花生碎，於上桌時供客人撒上面同吃。
香桃和風中華料理（21100363）
地址：灣仔駱克道126-128號2及3樓
營業時間：11:45am-12:00mn
東山黑草一齊食
不同產地的羊都有不同特性，像海南省的東山羊個子較小，一隻只有8至9斤，肉質軟滑但脂肪少，且羶味較小，較為一般人接受。大廚曾頌佳以整隻羊最瘦的部份——羊胸肉以滷水蒸煮製成冷盤，這部份就算放涼後食用也不會變韌，還帶點爽口口感。而全身最多肉的髀位當然用來起肉切絲或切片，炒出來的肉滑嫩似牛肉。
而傳統的羊腩煲，則選用較為肥美厚肉又較大隻的黑草羊，大廚特別加入臘鴨同燜，增加羊腩的鮮味，更將羊腩燜熟後再拆骨，食入口啖啖肉，凝脂軟滑入口即溶。
古法羊腩煲$180
以冬笋、冬菇、豆腐、馬蹄、臘鴨燜足2小時，肉質軟滑又腍，除有南乳與柱侯醬的香味，還有臘鴨的鹹鮮味。
Steffie：羊腩肥瘦適中，皮好爽、冇羶味，唔使蘸腐乳都好入味。
白切東山羊$160
以白滷水蒸東山羊的羊胸，然後切片。肉質嫩滑冇羶味，配合酸薑與海蜇一起吃更爽口。
龍苑（23151006）
地址：尖沙嘴彌敦道50號金域假日酒店低層1樓
營業時間：11:00am-2:45pm，6:00pm-10:45pm
