拒絕向周麗淇認輸<br>廖碧兒、陳豪失意鴛鴦互慰

拒絕向周麗淇認輸
廖碧兒、陳豪失意鴛鴦互慰

廖碧兒日前在無綫台慶頒獎禮中大熱倒灶,被傳拍劇換獎的周麗淇取得飛躍進步女藝員獎項。雖然廖碧兒與緋聞男友陳豪同變頒獎禮落難鴛鴦,但二人彼此撐腰,反觀周麗淇谷淚攞獎的表現,事後則惹網友狂插,輸贏難辨。

廖碧兒早前憑主演《妙手仁心III》及《心花放》兩劇成為無綫台慶頒獎禮中飛躍進步女藝員獎項大熱,最後卻被傳靠拍劇換獎的周麗淇以《秀才遇著兵》一劇奪獎,當晚周麗淇聞悉得獎上台時已經用手抹臉,接着谷淚領獎的一幕即惹台下噓聲,連日來更被網民留言狂插,指她表情假之餘,更戥廖碧兒不值。

前輩讚有進步

昨日廖碧兒在將軍澳接受訪問,其間不少途人一見她就說:「戥你唔抵呀。」問廖碧兒是否已聽過這句話無數次?她即笑說:「台慶嗰晚阿苗(苗僑偉)、志偉都有話我比以前進步,聽到呢啲評語都好開心。我唔覺得自己輸,又唔係參加比賽,拍劇亦唔係為獎,我係鍾意表演至做呢行,有獎係bonus啫。」
對於大熱倒灶敗於周麗淇手上,廖碧兒說:「熱門係你哋講啫,台慶前我忙到不得了,日日出席三個活動,冇乜睇報紙。我冇失望,心情冇乜嘢,好多人都話我今年進步咗好多,我都滿意自己嘅表現,做好自己本份就得啦,周麗淇嗰方面,我唔係好熟佢,大家冇合作過,只係喺公司見過。我睇過《秀才遇著兵》一、兩集,人哋做得好,公司台慶畀得獎佢,人哋攞獎我都戥佢開心㗎。」

同陳豪密密斟

談到周麗淇谷淚領獎惹非議,廖碧兒說:「我睇唔到,因為我坐嘅位置只係睇到佢背脊,都聽唔到噓聲。其實做藝人總有觀眾鍾意同唔鍾意,啲人踩佢都好無謂。」
廖碧兒緋聞男友陳豪角逐最佳男主角同告名落孫山,二人成了落難鴛鴦,未知二人會否互相安慰?廖碧兒笑說:「佢唔係好失意,佢係好簡單嘅人,唔使安慰。我哋成日有傾偈,但唔係傾頒獎禮嘅嘢,我哋不嬲都互相鼓勵,大家繼續努力啦。」
撰文:朱倬誼
攝影:陳偉權
服裝:SistyrMoon

廖碧兒

《我唔覺得自己輸!》輸家廖碧兒談及獎項得失時,仍充滿自信,字字鏗鏘。

廖碧兒與陳豪因合作《心花放》而傳緋聞,二人齊齊大熱倒灶。
資料圖片