理想家居：2,100呎唔夠闊落？客廳拆牆自製私人影院

一聽到2,100平方呎獨立屋，就以為一定有個過千呎廣闊大廳？非也，2,100平方呎除三層，每層約700呎，亦即一般村屋格局，每層700呎唔可能一望無際，點樣營造闊落感？想要個廣闊大廳，就要花花心思諗計仔，打通飯廳廚房，締造寬闊開揚客/飯廳！

記者：鄺天樂　攝影：黃子偉
Model：Yvonne@Salvodar
鳴謝：May@時尚雋美（27113281）

地下客廳做私人影院

香港地，700呎叫做中型單位，乘以3倍2,100呎都話唔夠闊？聽落的確有點獅子開大口，但各有各需求，身為影音發燒友的屋主張先生，就要求有個無敵大客廳，好讓他能夠安置一系列影音器材，自製私人影院（張生識歎，地下客/飯廳為私人影院，二樓則另設一套Hi-Fi音響作聽歌用）。另一方面，所謂「一家大小，食飯最緊要」，飯廳空間亦不容忽視，要滿足兩「大」要求，設計師阿May便花盡點子，逐一擊破。

■全新Nakamichi組合，高音純低音準唔在講，啡銀色外形高䠷，同一系列影音組合櫃襯絕。

■寬闊客廳讓男士們歎音響，阿May特設吧枱讓愛酒的張太可同三兩知己摸酒杯大談女人經。

最愛開放式廚房

獨立屋樓高三層，每層本來都是兩房一廳單位，要滿足以上兩個要求，阿May先花了不少唇舌游說張太將廚房改為開放式，增加飯廳空間感。受不了油煙味的張太雖然接受建議，但一直都頗擔心油煙會入侵客、飯廳，誰不知完工後，飯廳成為張太全屋最愛的地方。「雖然佢哋話裝個強力抽油煙機便可解決油煙問題，但始終煮食油煙大，都咪話唔擔心。但住落真係好鍾意個開放式廚房，夠晒開揚。」張家兩位鬼靈精小主人都話鍾意開放式廚房連飯廳，一家人邊煮邊食夠晒溫馨。