經過「番茄打狗耳」事件後，陳師奶每次看見我都掂行掂過，可能嬲我怪責她的Popeye啩，但我又冇做錯，你唔睬我，我咪唔睬你囉！好叻咩！直至有日，行山時碰見她和Popeye坐在路旁，面青口唇白，本來不想理她，行了幾步……心想萬一她有甚麼冬瓜豆腐，我咪見死不救？「陳師奶，你唔舒服呀？」「我好頭暈，慣㗎喇，血壓低啫，坐吓就無事！」於是我坐低陪她傾偈，等她回復元氣便送她回家。翌日，我拿着一盒類似肉碎的東西探她，「這是苦瓜尖，即苦瓜藤頂的葉，我加了青豆、蒜頭、洋葱、瘦肉碎煮的，對低血壓好有幫助㗎！」她即時試了一點，「很苦嗎？少少啫，記得煮熟晒其他材料，最後把苦瓜尖鋪面，冚蓋滾一滾攪勻就食得，唉，算嘞，你都係唔記得，等我煮你食喇！反正呢啲苦瓜尖唔係個個農場都畀你摘，事關摘咗就唔再生瓜。」佢捉住我隻手，甚麼也沒說……（四十七）
阿花