政府官僚作風原來唔單止係對市民，對自己友一樣。一九九九年政府一刀切將公務員分成新舊兩種聘用條件，新仔就再冇長俸，即係佢哋第日退休之後冇得每月領取退休金，但就變成強積金加公積金，即係政府同僱員各自供款，着數當然差好多。班新仔申請呢份工嘅時候已經知道，本來都冇嘢，點知最近高官過冷河嘅新政策，就無端端燒着埋班冇退休金嘅新仔，而且公務員事務局啲高官重口出狂言，令到班新仔好㷫，大家怒火難熄。
冇退休金點規管？
事緣房屋署前副署長鍾麗幗退休後出任恒基高職太張揚，重俾人話佢有利益衝突㖭，搞到平叔要收緊個高官過冷河政策，要消咗毒先至可以出外打工，違規嘅退休高官會俾政府扣退休金。最近平叔個公務員事務局就召開多場內部簡報會，向公務員講解新政策。有新仔喺會上提問，收緊高官過冷河政策只係會影響到有退休金嘅人，咁佢哋呢班新人類冇退休金，又點樣規管呀？係咪要扣公積金？但係扣退休金就有公務員退休法例做依據，公積金就冇法例喎。
煲呔說話係耳邊風
點知個主持人答得好妙，呢啲係二○二○，即十五年後嘅事，到時先至算啦！但係呢番話就聽到班新人類好刺耳，原來政府高官諗嘢係咁嘅，十五年後佢哋班高官自己都退晒休，𠵱家唔使諗咁多，費事煩自己。而且立法會議員關注嘅係𠵱家嘅高官退休後出外打工，會唔會有利益衝突，將來點樣唔會有人理。唉！真係一貫嘅官僚作風。
呢單嘢嘅迴響就好大，喺班新人類之間廣泛流傳，有人打電郵狂鬧平叔個局，真係反映晒高官做嘢嘅心態，可以唔理唔做就唔理唔做，教壞晒班師弟妹。
八方都感慨，煲呔成日話政府政策係要有持續性，但係高官就自己顧自己，香港嘅未來，唔關我事！
講開公務員事務局，八方有日撞到立法會議員張文光，佢話公務員人數已經減過指標，不過佢哋都唔會輕易畀政府開新位，特別係高級位置，不過，如果周一嶽個部門為咗公共健康、為咗對付新疫症如禽流感要開位，班議員都唔敢太阻撓，因為唔批而出咗事，邊有人孭得起？
傳真︰2623-9278
電郵︰[email protected]