被委任為在囚人士「更生大使」的郭可盈、米雪和楊崢，昨日在大潭峽懲教所內與一班女學員分享成功背後的代價。郭可盈表示因性格問題選擇了艱苦的工作，故此在每個階段都提醒自己自強。
香港懲教署與國際斯佳美容協會合辦「更生計劃之天生我才必有用──國際斯佳專業美容師文憑課程開學典禮」暨「活出燦爛人生」講座，昨日在大潭峽懲教所舉行，大會邀請了鄭明明、郭可盈、楊崢、米雪和尹志強幾位嘉賓，與一班在囚女學員分享他們成功背後所付出的代價。
分分秒秒自強
擔任更生大使的郭可盈在座談會上跟一班女學員分享生活點滴，她說：「我聽咗明明姐十五歲來港發迹嘅辛酸史，覺得自己好幸福，重充滿力量。我出身喺一個唔窮困嘅家庭，其實我可以就咁搵份普普通通嘅工，好安樂咁過呢一世，就係基於我性格，我選擇呢個咁艱苦嘅工作，喺每個階段都提醒自己自強。」
有關早前台慶頒獎禮是非得失，郭可盈又會否跟學員分享一下？她說：「我諗時間未必夠，班學員又冇睇報紙，所以一時間所有前文後理佢哋唔知，好難逐一咁講。其實喺我演員經歷，係甚少遇到最近呢啲不快事，今次面對呢啲不實報道都幾大感覺，我見到好多嘢，不過我唔會介懷，所謂清者自清。」
楊崢將任導師
另一位更生大使楊崢，將會擔任在囚人士的導師，她說：「我都希望可以利用我自己喺時裝界嘅經驗，去教導一班學員。我最初接觸一班學員，佢哋都好怕醜，真係好難想像佢哋之前做過壞事，我覺得佢哋係有希望。」
採訪：楊潔雯 攝影：何國豪
