NOW寬頻電視噚日慶祝上咗50萬客，華華記得冇耐之前同蘇澤光食飯，都重係講緊40萬，快得交關。如果能夠殺入長江和黃嘅新屋苑，咁60萬、70萬又有何難？呢一瓣生意，估唔到咁有潛力。
咁最難係咩呢？權威人士就話係鬼佬──即係英超聯班賣家。大家都知，呢個節目好受歡迎，亦係Cable嘅王牌，好多人都搶。咁你估3年轉播權要幾多錢呢？係超過1億美金。
所以邊個電視台投到呢個節目，都一定蝕，但又一定要投。以1億美金計，平均一年費用超過2.6億港紙，你話要收幾多個客嘅月費至夠？至於最得益嘅，除咗賣家同觀眾之外，重有馬會。馬會現在搞埋賭波，電視愈多轉播賽事（特別係直播），投注額就愈高，完全係坐享其成。